› 選擇地區
三藩市
紐約
洛杉磯
其他美國地區
香港 台灣 北美
 
2009年04月25日

男生圍:影帝張家輝此生無憾

張家輝在娛圈多年終於捱出頭來,成為金像影帝吐氣揚眉。

踏上頒獎台,一身白西裝的張家輝光芒四射,香港兩大電影頒獎禮的影帝殊榮,等了20多年,一次過拿到手。因為日夜趕戲,家輝少了時間陪女兒;又試過因為拍戲患上抑鬱症,老婆關詠荷憂心忡忡。最難熬還是頒獎禮前兩個月,家輝頻頻失眠。封帝前夕,關詠荷比家輝更緊張。患得患失後,獎座終到手,家輝舒舒服服安坐家中,滿足地說:「此生無憾!」 撰文:陳月媚

張家輝出道超過20年,雖然演技早已被影圈中人認同,但可惜他一直與獎項無緣,直至今年才開始轉運,憑林超賢執導的《証人》獲得香港電影評論學會大獎最佳男演員及香港電影金像獎最佳男主角。
這個星期,家輝所到之處都有認識或不認識的人走到其身邊說恭喜,又請他飲香檳,問他做了影帝有甚麼感覺?他日前說:「好攰囉!喺金像獎頒獎禮前兩個月,我已經覺得好煎熬,經常失眠,因為每個人都走嚟同你講,係你攞㗎啦!當個個都咁講時,唔得你話係咪好瘀,老婆仲緊張過我,特別係頒獎禮前一、兩晚,啲朋友又打嚟話戥我好緊張,唉!搞到我仲驚。」

感激劉德華賞識

在領獎台上,家輝感謝了王晶和杜琪峯,他日前接受本報專訪時補充:「我仲想多謝劉德華,當我喺電視圈走到電影圈後,我同華仔合作咗幾部戲,每一部戲佢都畀我有好大發揮空間,好有大將風範,從來冇試圖要壓我,到後來又叫我簽佢公司,最後雖然因為我先答應咗英皇,所以冇簽到畀華仔公司,但咁多年嚟,我一直冇忘記佢對我嘅恩德。」
不少演員膺影帝後都會自我膨脹,接着是接戲很嚴格,家輝就經常警惕自己莫犯這毛病,他說:「喺呢行咁多年,見住咁多人起起落落,所以我唔會因為做咗影帝就自我膨脹,開始學人揀戲拍,接戲都係睇劇本同導演。」
當獎項擺放在家後,家輝坐在沙發看到這個獎的時候,他就會心微笑,感到很滿足,他笑說:「你唔好笑我易滿足,我真係覺得此生無憾啦!你睇我有個關詠荷咁靚同善解人意嘅好老婆,又有一個聰明又善心嘅乖乖女,家仲畀我攞埋影帝,我覺得無憾啦!」
生了女兒後,關詠荷一直專心照顧女兒,不知何時才會再復出拍劇?家輝澄清自己沒有阻止過太太復出,他說:「我唔會咁自私,自己鍾意做戲就一直演落去,然後留老婆喺屋企湊女。其實我成日同老婆講,只要有啱嘅劇本,你可以隨時出番嚟拍戲,囡囡可以我湊或搵阿姨湊嘅,但佢家唔係咁放心,個女好黐佢,佢又好黐個女,唔知幾時先想出番嚟開工,不過我相信係遲早問題,因為佢一樣好鍾意做戲,早排我晚晚陪佢睇番重播嘅《陀槍師姐》,佢仲好回味自己嘅演出。」

曾被乖女趕落床

說到老婆與女兒,家輝不其然會露出幸福笑容,他表示:「好多謝老婆教到個女咁有善心同乖,不過有時我都會呷老婆醋,有次老婆同個女先上床瞓,到我上床想親親個女時,佢竟然同我講:『爹哋,走開啦!』幾乎要趕我落床,後尾咪即刻話佢知唔可以咁對爹哋,媽咪一定要同爹哋一齊瞓,咁個女就冇再嘈啦!但當時其實我係好唔開心,點解個女淨係錫媽咪,後來自己諗通咗先冇繼續唔開心,因為個女鍾意黐嘅人都係我最愛嘅太太,佢兩個對我都咁重要,我冇理由嬲佢哋咁儍。」

大懵爹哋瘀事多

在女兒眼中,家輝肯定是一個「大頭蝦」,因為家輝經常要女兒提醒自己帶銀包,他哈哈笑說:「有次返到屋企,諗住去隔籬商場嘅櫃員機攞錢,停車後行去櫃員機時,有時因為講緊電話,錢彈咗出嚟未攞番,我就好烏龍咁抱住個女離開,好彩個女提醒我,有次就走到提款機前先知忘記帶銀包,又要返轉頭攞銀包,所以家我話要去攞錢,個女第一時間問我帶咗銀包未,笑到我幾乎跌落地。」

戰勝抑鬱症

曾經患過抑鬱症的張家輝,前年找醫生診治後,已經沒有再復發,他說:「當日我因為喺雲南咁惡劣嘅環境下拍戲先會鬱出呢個病嚟,喺呢個病初期老婆同朋友都好擔心,但我終於克服咗呢個病,如果要再去雲南拍戲我都唔會驚,因為好似你患呢隻感冒菌後,以後就會對呢隻菌有抗體。」

攝影:林德雄

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載