蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年05月13日

馮仁昭四圍超:
蕭定一搞揞名廣播劇出賣新歡舊愛 - 馮仁昭

李彩華曾經係蕭定一嘅緋聞女友兼旗下藝人,唔知蕭定一會唔會爆佢啲嘢呢? 資料圖片

揞名爆料喺娛樂圈風行多時,隨口噏就有早排搞到滿城風雨嘅魔術鹹豬手同集郵女星。出位製作人蕭定一覺得呢條橋work,決定同三個男拍檔聲演揞名爆料廣播劇《C1色生活》,四人會扮成唔同階層嘅人物,喺網上電台狂爆現實中喺夜店嘅所見所聞,但全部唔開名,呢個廣播劇下星期四晚會播,大家想知邊個藝人媾女仔、夜蒲出事,就要一味靠估喇。

Rock友拖馬爆粗

馮仁昭聽聞蕭定一已錄好部份廣播劇內容,例如佢會踢爆一單喺兩星期前發生嘅夜店拖馬事件,男主角係「Rock友歌星」。蕭定一同馮仁昭傾開電話時仲講番事發情況:「當晚我同個朋友去咗Basement(酒吧),朋友好醉,醉到見人就鬧,咁啱『Rock友歌星』喺度,朋友突然拎個煙灰盅車埋佢度,『Rock友歌星』㷫到係咁爆粗,仲拖馬落嚟,好彩我個朋友走先,冇事。」
已有要好圈外女友嘅蕭定一仲會將個人感情事擺上枱,呢兩日正好有新題材發揮,事件涉及佢嘅舊愛女星「7歲」,蕭定一話「7歲」嘅現任男友「矮仔」,竟然趁女友唔喺香港時搞搞震,透過交友網站Facebook媾女,但蕭定一越講越㷫:「因為個矮仔媾緊我家嘅女朋友呀,離晒大譜!」
蕭定一喺電台狂爆料,不過佢唔擔心人哋一見到佢就彈開或者排斥佢,佢話:「我又冇開名,有人話唔係嘅,咪當件事係假囉。」至於佢提及嘅「7歲」係咪傳過緋聞嘅石詠莉或李彩華?「Rock友歌星」又係邊位?佢就唔肯講,大家自行猜謎啦。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載