› 選擇地區
三藩市
紐約
洛杉磯
其他美國地區
香港 台灣 北美
 
2009年05月17日

星街:鄧萃雯愛柴九傷心傷身

自從如妃大熱倒灶後,鄧萃雯對攞獎問題已睇得通通透透。

鄧萃雯和黎耀祥近日在無綫劇《巾幗梟雄》大鬥演技,帶出好戲連場,雖然雯女與祥仔實力該是半斤八両,但首次跟祥仔過招,雯女嗌破喉嚨仍被祥仔嘹亮的聲線壓倒,她自爆曾因「頂唔住」要向祥仔求饒說:「你唔好咁勁得唔得呀!」雯女激讚祥仔壓到場、有感染力及懾人氣勢之餘,更自爆愛上祥仔飾演的柴九:「如果現實生活中有咁嘅人出現,真係好無憾。」 撰文:戴彩煥

鄧萃雯與黎耀祥首次在《巾幗梟雄》大鬥戲法,有網民甚至發起:「黎耀祥vs鄧萃雯……邊個演得好!」的大比拼,雖然二人網上支持者各佔一半,鬥得難分難解,但所謂兩雄相遇必有一傷,在拍攝《巾幗梟雄》期間最傷的,原來是雯女。

拍劇缺氧氣袋保命

日前雯女接受本報記者專訪,在談到拍攝《巾幗梟雄》的苦處時,她說:「我個角色同好多人對立,好多時嗌破喉嚨,血氣唔夠,尤其是對住黎耀祥,佢把聲好嘹亮,同佢對峙時,佢一開聲就大聲過我,我要深呼吸一口氣至夠佢嚟,真係幾吃力。我成日同祥仔講笑咁講:『你唔好咁勁得唔得呀!』後尾有場同黃智賢對峙嘅,我真係拍到缺氧,嗰場戲要好有氣勢、唔可以輸,如果我講錯一句,成個蔣家嘅人就要死。我之前已經拍咗成日,又唔夠瞓,感覺已經想死,到拍呢場戲時,我吸好大啖氣,跟住個人wingwing哋,唔係好focus到,小紅姐(惠英紅)見到即刻吹個紙袋畀我慢慢吸氣,咁先至冇乜事。」

主僕之情微妙變化

雯女84年加入無綫藝員訓練班,比祥仔還早一年出道,但過去20多年二人卻未有一次正正式式的合作機會,直至今次《巾幗梟雄》才有機會碰頭,叫雯女興奮莫名,過足戲癮。雯女:「祥仔好壓場,好有感染力同懾人氣勢。好似蔣家嘅人迫我交番條鎖匙出嚟嗰場戲,足足有10幾頁紙對白,祥仔企出嚟話條鎖匙係大枷鎖,真係好精采,在場所有人都俾佢感染咗,自己都不期然俾佢感動到真情流露。其實,祥仔柴九呢個角色就好似《金枝慾孽》嘅如妃咁估佢唔到,每一個過程都好有變化,有時會覺得佢好可愛,有時又會覺得佢好衰格,祥仔真係做得好好,我相信佢今次可以爆出嚟。」
四奶奶與祥仔飾演的柴九本是主僕之情,直至後來四奶奶與柴九被迫當上太平天國要職,二人之間的感情終起了微妙變化。對於四奶奶與柴九之間的感情瓜葛,雯女形容是自己從演以來最複雜的一次。雯女:「佢哋嘅關係千絲萬縷,唔係鍾意咁簡單,好唔一樣,如果用愛情嚟形容佢哋呢段感情實在太膚淺,因為佢哋之間已經超越咗愛情。」

奶奶有難柴九救命

不單止觀眾喜歡柴九,就連雯女也被柴九深深吸引,雯女說:「每當四奶奶遇到困難,佢都會突然殺出嚟幫我解決件事,突然有個人出嚟保護我,真係好man㗎。老實講,我一生都未遇過咁嘅知音人,可以成為自己心目中嘅英雄,無時無刻出現支持自己,可以至死不渝嘅愛情……我都好希望自己人生中,能夠遇到一個好似柴九咁樣嘅男人,如果現實生活中有咁嘅人出現,真係好無憾。」

渾身是戲擦獎而過

鄧萃雯入行24年,由稚嫩的《薛仁貴征東》到渾身是戲的《巾幗梟雄》,最佳女主角當之無愧,但視后獎項偏偏與她無緣,04年如妃娘娘飲恨敗於黎姿手上,更令全城嘩然!

蒙嘉嘉《師奶兵團》

07年
當年視后:李司棋《溏心風暴》

Hilda姐《女人唔易做》

06年
當年視后:佘詩曼《鳳凰四重奏》
雯女:「呢個角色好似唔使花太多氣力去演,好容易投入,因為我只係做番自己,所以拍攝時都手到拿來。Hilda姐外表堅強、倔強、唔會蝕底,我拍呢個角色時,往往睇到平時自己唔為意嘅一面。」

如妃《金枝慾孽》

04年
當年視后:黎姿《金枝慾孽》
雯女:「以前從未演過奸角,根本唔知道自己可以演到一個咁深沉、壓得場嘅角色,單係一個眼神已可以殺死人。加上角色立體,變化亦好大,畀觀眾睇到如妃其實都有善良一面。」

分飾多角《LovingYou》

02年
當年視后:鄭裕玲《男親女愛》
雯女:「我喺劇中要扮唔同角色,感覺好好玩,今日做賢妻良母,聽日就做淫婦,自己演出時都豁咗出去,對我嚟講係一個相當好嘅訓練機會。」

雯女讚如妃奸到爆

04年《金枝慾孽》中如妃一角將鄧萃雯的事業推上高峯,未知雯女可寄望四奶奶能像如妃一樣,再創事業高峯時,她笑說:「當然希望!《巾幗梟雄》劇本好,個個都係好戲之人,絕對有條件成為一部叫好叫座嘅劇集,自己拍緊嗰陣都知道自己拍緊一部好嘢,但有時quality同收視係唔成正比。」四奶奶跟如妃同是雯女從演以來最喜歡的角色,不過,雯女坦言不論自己還是觀眾,都會對如妃感覺大許多。雯女:「如妃出嚟效果咁爆,係因為觀眾從未見過一個咁奸嘅鄧萃雯,但四奶奶呢個角色好鮮明,今次未必有咁多新發現。」

「我唔係咁有鬥心」

儘管四奶奶的角色變化不及如妃大,但四奶奶冰雪聰明及堅毅不屈的性格,依然深受觀眾及網民擁戴,希望雯女今次可憑四奶奶一雪前恥,奪得視后寶座,對於爭奪視后問題,雯女笑說:「我知你會覺得我又係畀個standard答案你,但我依然都係嗰幾句,我一直好享受拍攝過程、專注自己演出,獎項嘅嘢唔係好介懷。我好感激觀眾多年嚟一直咁支持我,但我唔係咁有鬥心,如果叫好叫座我已經好心滿意足,我唔係咁貪心,對我嚟講,獎項只係錦上添花啫。」

攝影:林德雄
髮型:Michael(TONIGUY)
服裝:ckCalvinKlein
場地:Cusina(MarcoPoloHongkongHotel)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載