› 選擇地區
三藩市
紐約
洛杉磯
其他美國地區
香港 台灣 北美
 
2009年08月01日

男生圍:Jan談情說性爆三字經

林海峰於訪問中絕口不提自己當年的婚事。
攝影:黃文成

做騷做上癮的林海峰(Jan)將於下月17至22日再闖紅館,今次talk騷主題為「是但噏我願意」。阿Jan是但噏由伊館走到紅館,一噏就噏足幾年,更場場爆滿,不過他堅持不會將自己的婚事擺上枱,又表示不輕易說我愛你,更將這句話與《三字經》相提並論,且看他如何是但噏。 撰文:李珮洳

訪問當日林海峰換上不同的T恤讓不同的傳媒拍照,於是追問他於talk騷會推出甚麼紀念品,正如阿Jan每次所講,一開騷大家最關心的就是T恤、Cap帽、袋、貼紙合共有幾多款,紀念品所賺取的利潤比門票收益更高。阿Jan解釋每次開騷設計紀念品不是為了牟利,而是作為印記,好讓自己及觀眾記得那種紀念品屬於那一個騷。

讚太太付出有凸

既然今次talk騷的題目為「是但噏我願意」,我願意三個字自然令人聯想到婚姻大事,於是打蛇隨棍上問阿Jan有何印記令他紀念自己與彭羚的婚姻?一向口齒伶俐的他一時語塞,想了幾秒笑笑口說:「呢個唔係我個騷嘅內容,又講我自己嘢嘅話,我怕悶親大家呀,到時真係萬劫不復呀。」輕輕將話題帶過。這個答案當然不能滿足大家,於是轉個方式問阿Jan除了求婚時聽過我願意三個字,之後還有沒有聽過?他說:「我願意嘅地位同我愛你差唔多,即係好似日全食咁,幾百年先見到一次,真係要買定天文望遠鏡去等先睇到,真係好罕見。」
阿Jan承認自己絕不輕易說我愛你,他表示:「我愛你同我咩你(指粗口)有住同樣重要嘅地位,呢兩句說話喺中國人三字經入面都非常重要,一句就係日全食唔係成日接觸到,另一句就成日接觸到。」
及後與阿Jan談及當年與彭羚於海外秘密結婚一事,他只笑而不語,問到雙方婚前婚後的承諾有多少兌現了,他言語間讚美太太說:「佢冇應承到嘅就做多咗,當年明明說明書冇講有呢個function,但最後又會有喎。但係男人就好多時會掉轉,一開始說明書講到明有幾萬種function,出到嚟又變冇,所以我幾時都話母愛係偉大嘅,個個都鍾意媽咪多啲,因為佢付出亦比較多。」

呻養家負擔沉重

記者即取笑阿Jan有賢內助有賺,他笑說:「我太太開始對於媒體報道有關佢嘅生活有啲過敏,我讚佢嘅說話佢未必會睇。」阿Jan更以股票來形容太太,他繼續沒正經的說:「呢隻股我高位入,家可以話係賺緊,即係人哋所講嘅獲利回吐。」記得當年彭羚得到最受歡迎女歌手獎,阿Jan聞言表示:「你又唔知我壓力大啫,我好大負擔o架,家佢去沙灘玩,用得最多係油錢。」

開騷越做越上癮

交代完自己的感情事,阿Jan指今年舉行的talk騷最大目的是為了頂癮,原來他開始做騷做上癮。阿Jan解釋每次做騷都帶來很大的滿足感,不過很快就會身痕,他說:「做完一次頂唔到幾耐癮,時間越嚟越短,好快又想做一次,加上屋企消費大啦。其實今次『是但噏我願意』喺上次一完騷已經諗定。」
不過阿Jan希望下次再舉行talk騷的場地,由紅館返回伊館,因為他覺得伊館與觀眾的距離較近,開騷時就如食飯與家人傾偈般親切。

同林峯一家親

訪問阿Jan時他提起其姊林珊珊的一件事,他透露當年珊珊擔任鄰居的伴娘,要悉心打扮,他邊笑邊說:「我當日見到我家姐個妝,以為自己睇緊國慶表演,佢真係好似喺停屍間嗰啲,真係俾佢嚇一嚇。」

親戚撲錯飛

取笑完家姐之後,阿Jan又提起早前林峯開演唱會發生的一段小插曲,他指父母接到不少親戚朋友的電話要求買飛,他說:「我阿爸收到啲電話主要係問佢,你個仔係咪開騷呀,我想要飛呀,幫我買呀。我估今次到我開騷,林峯啲親戚同朋友會打番畀林峯個老竇買飛。」阿Jan更笑言希望與林峯及林一峰齊齊Let'sgetwet。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載