› 選擇地區
三藩市
紐約
洛杉磯
其他美國地區
香港 台灣 北美
 
2009年08月01日

模範里
JaniceMan三歲定前程

曾經跌入事業谷底的JaniceMan獲黎明打救升呢做模Art,休息半年的她如今已蓄勢待發,繼續做女模之餘還銳意進軍大銀幕。

o靚模湧現,少男fans當然叫好,但喝倒采的也大有人在。現在最紅的o靚模是周秀娜,元祖級的o靚界女神JaniceMan和Angelababy已各自升呢,一個被老闆黎明叫作模Art,一個則自稱潮模。曾經親若孖公仔,結果Baby搭火箭殺入日本,Janice則中途跌入雪櫃,但3歲起已擔任父親御用模特兒的她,注定吃娛樂圈這行飯,急凍半年獲黎明打救出生天,回想谷底黑暗期,Janice自認全靠阿Q精神捱過。
撰文:麥佩儀

啡金長髮加「大眼仔」,再配cap帽與貼身Tee,JaniceMan(文詠珊)堪稱旺角潮女裝扮指標,少男眼中女神,o靚界女神的神話正式開始。晨早染金髮扮o架妹的她,其實百分百madeinHongKong,父親從商,媽咪是典型家庭「煮」婦,還有一個比她細6歲的弟弟。

「最大嘅敵人係自己」

Janice身為家中長女,深得父母疼錫,3歲已隨父母周遊列國,又是父親鏡頭下的御用模特兒,她說:「媽咪話我細細個就好鍾意擺甫士,尤其見到爸爸攞住部相機影相,就會不其然扭扭擰擰,可能因為咁,所以14歲有人搵我做模特兒,爸爸就答應畀我試一試。」
Janice當上模特兒後,與好姊妹Angelababy(楊穎)以孖公仔姿態冒起,成為o靚模始祖,前途本來一片光明,但兩人實在太相似,最終變成競爭對手。半年前Janice與前模特兒公司因續約問題談不攏被雪藏,由炙手可熱變成冰封女神,同一時間Angelababy及大班o靚模乘機發功,前者簽約日本公司開拓市場,後者谷胸賣肉炒人氣,好不熱鬧。
以為冰封的Janice就此玩完,未料黎明忽然宣佈Janice加盟,身價三級跳之餘,由行時裝騷到躍身紅館做黎明個唱嘉賓,塞翁失馬,焉知非福。談到事業低潮期,Janice說:「我以前係一個好悲觀嘅人,朋友都話我經常諗唔好嘅嘢,但經過之前一段日子,反而好多嘢都識得用阿Q精神去諗,而且我明白到只要自己有付出努力,總會得到好成果。」
休息半年充電後整個人脫胎換骨,眼見昔日好友Angelababy走勢凌厲,她說:「我從來都唔會同人比較,因為咁會令自己好辛苦,老套啲都要講,自己最大嘅敵人就係自己,家我只會專心做好眼前工作。」
Angelababy泊到日本avex大碼頭,Janice也有黎明做靠山,她說:「能夠簽到黎生,我覺得真係好幸運,呢個係我人生轉捩點。最初我都驚黎生好惡,但相處耐咗發現佢原來好nice,講嘢仲好有point。」金句王黎明說話一向難明,Janice似乎特別有慧根,她說:「我研究過,佢講每句說話其實都有意思,只係我領悟力低,要多啲時間消化,不過都學到嘢。」

撐谷胸o靚模有市場

o靚模近日成為負面形容詞,引來一片喝倒采聲,Angelababy索性劃清界線自稱潮模,升呢模Art的Janice對於現時的o靚模行性感騷胸搶鏡搶工作沒意見,但也出言力撐說:「我知道近日坊間有好多唔同聲音,相信係一時間多咗咁多新面孔,大家消化唔切先至會產生唔同意見,呢個好正常,但我相信佢哋只要努力做好本份,人哋都會睇到。」對於有模特兒狠批o靚模不算模特兒,只會在這圈子內搞搞震,Janice說:「模特兒有好多種類,有需求自然有供應,都係各取所需。」

大個女愛得坦然

JaniceMan出道不久即被封為o靚界女神,迷倒不少電車男,但她依然毫不避忌,經常與富家子男友阿峰行街拍拖,感情生活浮面,難得不少電車男仍然對她愛護有加。
不過JaniceMan強調自己從沒刻意高調拍拖,只是傳媒將其私生活放大而已,她說:「我就嚟21歲喇,我覺得即使有感情生活亦唔係一件出奇嘅事,而且父母一向都知道我係個有分寸嘅人,絕對唔會因為私人事影響工作,所以冇反對我拍拖,但係現階段我一定會將工作放喺第一位。」

娛樂資料庫:o靚模男友多有米

除JaniceMan外不少o靚模均有男朋友,不過做o靚模的另一半一定要忍得,忍得住女友工作時間日夜顛倒兼經常袒胸露臂任人影,難得眾o靚模食得住班觀音兵隨傳隨到,真有一手。
資料來源:《蘋果》資料室

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載