蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年09月19日

滕麗名癡心錯付
郭政鴻「我係有個女」 - 馮仁昭

郭政鴻噚日承認俾雜誌影到嗰個9個月大嘅BB係自己個女,但就唔肯回應係咪同番前妻李欣穎復合。 資料圖片

郭政鴻06年同結婚3年嘅廣州小姐冠軍李欣穎離婚,事隔一年就同滕麗名拍劇撻着,雖然佢兩個從冇公開承認拍拖,但喺圈中佢哋已經係公開嘅一對。不過,有雜誌影到鴻仔早幾日同前妻及一個9個月大嘅B女同行嘅相,話鴻仔同前妻去中旅社幫B女攞回鄉證,而B女個名叫郭X欣。報道仲話鴻仔年幾前暗中翻兜前妻兼生埋女,令滕麗名癡心錯付。

「我會盡父親責任」

單新聞前日曝光之後,鴻仔一直未有回應,直至噚日,佢終於同馮仁昭聯絡,承認被影到嗰個BB係自己個女,鴻仔話:「我係有個女,我會盡父親嘅責任。」問佢係咪同前妻喺埋一齊,鴻仔一概以私事為由唔回應,佢話:「感情事我一向唔講,呢啲係自己嘅私事,所以唔會回應或者交代,今次講完之後亦唔會再講,我唔想因為自己嘅事影響到屋企人,佢哋唔係圈中人,冇必要承受呢啲壓力,總之要交代嘅人我已經交代咗。」問佢家同滕麗名究竟係乜嘢關係,鴻仔話:「由始至終都係好朋友,我哋從來都冇講拍拖,到家都係好朋友,永遠都係好朋友。」
問佢前日點解玩失蹤,連夜晚《廉政行動2009》首映都唔出現,鴻仔就解釋自己真係病咗唔舒服喎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載