› 選擇地區
三藩市
紐約
洛杉磯
其他美國地區
香港 台灣 北美
 
2009年09月19日

楊千嬅押注丁子高嚐甜頭

楊千嬅與丁子高相戀兩年半後修成正果,本報日前獨家踢爆他們上月11日在美國賭城秘密結婚後,這對新婚夫妻大方承認喜訊。千嬅對於丁子高的過去一清二楚,「拍拖初期全世界走嚟同我講呢個男人有幾壞」,但以烈女自居的她繼續全情投入,決定在感情上豪賭一鋪,結果本利齊贏。
撰文:陳月媚

楊千嬅與情場浪子丁子高沐浴愛河之初,一直沒有人看好,女方的朋友此起彼落出現反對聲音,連經理人公司與父母都因為擔心而給了兩人沉重壓力,為了維持這段感情,兩口子鬧過、哭過,甚至試過逃情,然而經歷過種種挫折和風浪後,他們還是堅持走在一起,因為沒有放棄,最終贏得大家的祝福。

「朋友話我玩火」

對於丁子高的過去,千嬅表示不用外界來告知,因為在接受對方之前,丁子高已毫無保留告訴她,喜歡挑戰的千嬅願意豪賭一鋪,結果這局她贏了。千嬅日前在半島酒店細訴這段情的苦與樂:「拍拖初期全世界走嚟同我講呢個男人有幾壞,我同佢哋講,以前嘅事我全部都知道,因為每個人都會有過去,所以我唔care,我只care以後嘅佢,朋友話我儍,話我喺度玩火,遲早受傷害,我唔介意,我信自己嘅直覺,而事實上佢同我一齊之後,佢成個人變咗好多,就係因為外界帶咗偏見同誤解睇佢,反而令阿Real(丁子高)更加循規蹈矩,講真同我一齊,佢壓力比我仲大。」
在感情發展了約一年,千嬅認為是時候把男友帶返家中見家長,曾當過老師的嚴父第一次見未來女婿就施展一招牌品好、自然人品好來試探丁子高。大笑姑婆千嬅掩嘴笑說:「阿Real嚟我屋企坐低冇耐,爹哋就話打牌,我加媽咪、爹哋同佢一齊打,見佢戰戰兢兢咁打,我一路有留意父母對佢嘅反應。媽咪一路笑笑口,呢關應該過咗,但爹哋一向好嚴肅,向來面上唔多表情,所以我都有啲緊張,直到佢離開咗之後,爹哋先至同我講,話呢個後生仔幾有禮貌,唔似出面寫到咁差呀,呢個時候我先至鬆一口氣。」

老公實戒烈酒

雖然35歲的楊千嬅較丁子高年長5歲,但千嬅認為老公處事比自己還要成熟,而且經常絮絮話她這樣不對、那樣不對,有時她真的以為自己多了一個爹哋:「佢有陣時都幾長氣,話我有哮喘、唔畀我飲酒、唔准我飲凍嘢。你知啦,我係烈女,梗係飲烈酒,但識佢之後,有時去到卡拉OK唱歌,相熟嘅服務員慣性同我講『楊小姐係咪照舊(飲威士忌)呀!』但佢瞪大眼望住我,咁我咪乖乖咁話:『熱茶啦!』服務員好似自己聽錯,後來見我冇出聲就識趣離開啦!」
不過在老公不在場監督的情況下,千嬅還是會保留這份任性,在訪問當日,她在半島酒店甫坐下來就叫了一杯凍飲,喝了一大口後,她鬼馬說:「嗱,家佢唔喺度,我先至可以偷飲凍嘢,平時佢喺度我飲凍飲肯定俾佢哦成粒鐘。」
千嬅又爆老公很愛美兼愛潔,家裏一塵不染,所以他最難忍受另一半喜歡凌亂美,千嬅說:「佢每次入到我間房就話睇唔慣咁亂,叫我唔好成日將啲嘢亂咁擺,又話女仔點可以咁,有時佢忍唔住要幫我執拾,佢個人好鬼愛乾淨,仲有少少貪靚,第時同佢住,我死梗,有排要適應。因為將來要同奶奶一齊住,奶奶都係好愛乾淨,我諗第時都要盡量將啲壞習慣改晒啦。」
跟鄭中基分手後,千嬅有一段時間是愛情空白,她感到無限的空虛和寂寞,直至兩年多前,當她遇到一個浪漫的大男生對自己熱烈追求,不斷灌輸正能量給她,對愛情已沒有絲毫期望的烈女,芳心終於被攻陷。千嬅淡然一笑說:「同阿Real一齊之後,我真係開心咗好多,雖然期間會感受到外界壓力,但一樣係愛得好甜,佢的確改變咗我好多,而佢娶咗老婆後,更加有上進心,佢準備同老闆夾份開一間公關公司,試吓自己創業,佢做咗公關呢行六年,我都好支持佢自己創一番事業。」

結婚周年開個唱

在美國註冊結婚後,現時千嬅和老公還是分開居住,直至明年中補擺喜酒後,兩人才會覓愛巢一起生活,之後兩人仍然會繼續各自在事業拼搏,她說:「結婚之後,我會繼續工作,因為我仲有好多夢想未達成,好似我仲未攞過影后,又未出過國語碟,我點甘心呀。不過做還做,過多兩年我會生仔,最好一次生對龍鳳胎,咁我就可以收工啦。」
千嬅與東亞娛樂的合約到明年中約滿,對於續約與否,她滿肚密圈說:「公司對我好好,公司畀我有好大發展空間,所以續約成數好高,出年我希望可以喺結婚一周年紀念日,即係8月11日開始舉行個唱,然後就擇日補擺喜酒。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載