› 選擇地區
三藩市
紐約
洛杉磯
其他美國地區
香港 台灣 北美
 
2009年09月27日

BuyMeASunday:託人買嘢 - 黃偉文

2009AW
比較常要託人在英國買的,是款多量少的VivienneWestwood。

他們說一齊打麻雀最能看出一個人的「真身」。
他們說一齊去旅行最能看出一個人的「真身」。
他們說一齊唱K最能看出一個人的「真身」。
他們都講漏了,由我補充,「託一個人買嘢」,最最最能看出一個人的「真身」。

香港人的驕傲

香港人,最鍾意「託人買嘢」。
2000年後才有點進步吧,科技進步了,價格便宜了,香港人坐慣飛機去慣旅行見慣世面了,才比較沒那麼狼死,以前聽到生張熟魏預備遊埠的消息,一個月前已開始死諗爛諗,諗到人家出發前一日也不罷休,誓要諗到託人家買一點甚麼,否則好像便宜了他們似的──去巴黎的託買時裝;去加拿大的託買三文魚;去日本的託買化妝品;去英國的託買Harrod's袋……你以為去些非購物熱點可以倖免於難嗎?開心得太早了,香港人就是有這種本事──去菲律賓的託買芋頭雪糕;去泰國的「託」買四面佛;去印度的託買神油;去台灣託買銅鑼灣都有得賣的豬肉鬆……也不想想人家難得的假期和寶貴的行李磅數,總之慌死蝕底唯恐執輸前世未買過嘢咁。
我說2000年後有點進步,但其實不很多,「其他地方」可能忍手一些,但遇着東京巴黎倫敦等地,即使明知香港的正貨舖水貨舖炒舖款式尺碼更齊全,浪費了朋友的時間精神腳骨力其實也不過慳了10%,正宗港男港女還是有鋪癮託人買lee買lu,最乞人憎的部份是,通常落完柯打之後都會懶體貼地加一句:「你順路先啦,唔使專登去o架,買唔到都OKo架。」頂,唔加尤自可,加了更想兜巴星。如果買唔到都咁OK,為甚麼煞有介事打完電話再發短訊send埋email嚟,你其實明知我唔會「順路」經過秋葉原的女僕咖啡室。
我也好憎自己,講完畀啲friend知我幾時幾號去日本,總是順口溜出一句「有冇嘢要買?」每一次我講了都後悔,每一次我都警告自己下次不要再講,但每一個下次還是條件反射般衝口而出「我下個禮拜去日本,有冇嘢要買?」sxxt!我又講了。
雖然,我同時也練成了「聽咗算數」這種自保的絕招,但人心肉做,人家託了你10次你「sorry唔夠時間」了9次,第10次還是有點不好意思,問一問同行的老公/老婆/男友/女友「係咪都應該兜路去幫阿XX買番次呢?」
其實,一日都係你自己衰,鬼叫你上次信口開河託了阿XX去買了那件其實唔係非要不可的限量別注版ApeT恤,而他真係幫你買了,今次專登搭程車去秋葉原你怨得邊個?嘩唔係橫濱中華街咪算你好彩囉!

人人有份的恐怖實例

係,早已練成面懵懵樣衰衰「逢十進一」的我,絕大部份時間都相當「好意思」詐唔記得、詐唔順路,甚至回來後擘大眼講大話「真係幫你去過不過賣晒」。但偶然亦有例外,例外的意思是:不能「聽咗算數」,而要即時絕交!例如,某年某月某日某情侶,知我去東京,竟然託我買電單車頭盔,而且是一對,一大一細因為他們要情侶裝。黐~線!點解會有人認為我知道東京邊度有情侶裝的電單車頭盔賣?而且還會順路經過?而且還不介意買完之後「重立立」咁幫佢抬足一日,不計付出腰力臂力,不惜犧牲當日原本可拎自己嘢的opportunitycost?還覺得我肯騰出自己都唔夠用的有限篋位,塞兩嚿又阻碇又過磅的龐然大物入去?嘩呢啲乜嘢人嚟o架大佬。
他們竟然夠膽開口提出這樣「不情」的不情之請,我覺得不是他們的問題,是我的問題:我真的要好好檢討一下,自己多年以來苦心經營的惡死黑面形象,為甚麼唔work,居然給人家一個印象「我係肯幫你抬兩頂頭盔返嚟嘅白癡」?
惟有當是報應,「回望我一~生」,其實落過更多更離譜的定單,而且託的人是比我自己更不可能100倍的人,而居然好多次都成功了,如果「厚顏」是種成就,我一定早已升呢到「無恥」的境界。
隨便舉幾個例都嚇死你:我託過平時連街都唔行的黃耀明替我買了對Comme的DesertBoots回來;也託過平時只有他託人買嘢的雷頌德,替我搬了件也是Comme的厚絨trenchcoat回來;又託過連她老公都不捨得「使」她的徐濠縈,幫我抬了對10磅重Yohji豹皮鬆糕鞋回來;更託過我相信全香港冇人夠膽叫佢買嘢的陳奕迅,從倫敦空運了一件成個篋咁大的VivienneWestwoodsheepskin大褸返香港……
口口聲聲批判不近人情的「託人買嘢」黨,原來香港紀錄保持者,「託人買嘢之王」是我。
應該慚愧的事居然還覺得不枉此生,Iamso香港人!把自己無理取鬧的事迹放上Youtube還以為大快人心的那種。

本周欠單

Yeah!出嚟行,預咗還。
我份人沒甚麼好,勝在均真,而且有恩有仇都必報。
所以阿徐叫我在倫敦幫她買Chanel我並無怨言,為Eason走勻巴黎東京搜購演唱會服裝我甘心命抵,上文提到的黃生雷生,雖是超過十年前的事,我到現在都記得欠人家一個人情未還。
當然,咸豐年嗰陣叫過我買粉底的湯XX,叫過我買洗頭水的伍XX,叫過我買西裝的歐陽XX,與及所有「未還」的人,下次出埠前請自首,我是記得的。
至於那些我後來才發現是信錯人愛錯人的某某與某某,則不用借啲意出現了,以往被騙的感情和腳骨力,當我豪畀你嘅!
更正啟事:上期尾句該為「inventyourownstyle!」
本欄逢星期日刊出
Textby黃偉文
mailto:buymeasunday@gmail.com

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載