蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年10月11日

舊約未了 火速投星皓
Theresa高調開工挑釁金牌

傅穎(Theresa)早前才向金牌大風要求解約,但昨日她已火速出席由胞姊傅娜代為接洽的慈善活動,現場更由新經理人星皓的高層傍實到場,Theresa全程表現風騷,似乎未受合約問題困擾,更順道公開與星皓的合作關係。Theresa不但趁星皓一姐林嘉欣萌去意之時攝位而上,也擺明向舊公司金牌示威兼宣戰,極不畀面。

相關新聞:傳一姐林嘉欣離巢劉心悠喜Theresa加盟

傅穎在02年加入女子組合Cookies闖娛樂圈,05年開始獨立發展,其間一直獲金牌大風力捧,但最近卻跟公司意見不合,Theresa日前向公司發律師信提出解約,合約問題仍在解決中,但她已簽約王海峰旗下的星皓做新經理人,涉嫌違反舊約。Theresa昨日高調出席商台與保良局在將軍澳合辦的慈善獎券開售剪綵禮,她表示活動是由胞姊傅娜代為接洽,而新公司星皓更派出高層護駕,擺明要剃舊公司眼眉。
雖然金牌前日向傳媒發聲明推翻Theresa的食穀種言論,並指對失實言論保留法律追究權利,Theresa非但沒低調行事,昨日更高調出巡,穿上白色透視露肩上衣配長褲出席慈善活動,身邊更換上星皓經理人部董事總經理彭淑霞(Polly)和兩名同事陪同到場,現場還有近30名fans拉橫額兼吶喊為偶像造勢。

新公司高層傍到實

Theresa昨日首度以星皓旗下藝人身份亮相,以勝利香肩示人,狀甚風騷,她主動解釋活動是由胞姊傅娜代為安排,Theresa更由Polly陪同接受訪問,她甫開口便說:「多謝傳媒喺呢段時間對我嘅包容,多謝金牌過去7年嘅栽培,今日係我簽新公司第一日見傳媒,有好多嘢都需要詳細交代。」
談到合約由金牌大風和TalentBang同時擁有,解約必須三方同意,Theresa說:「上個月金牌大風主動同傳媒講公開解約嘅事,當日佢哋主動講願意無條件解約,我問過律師嘅意見,要有一個正式嘅回覆,所以出咗律師信畀金牌大風,內容係接受金牌大風嘅offer願意無條件解約。家正式簽新公司,以前嘅事唔會再諗,希望將來有更加好嘅發展。」
對於金牌大風前日在聲明中,強調Theresa過去3個月工作不斷,指她月入6位數字收入,Theresa平靜說:「我認為係不實,要攞證據證明一定有,不過我唔方便亦唔想講太多嘢,交畀律師處理。」

相關新聞:Stephy戥公司唔開心

稱合約問題已解決

金牌CEO陳輝虹寸Theresa愛搵律師解決問題,她早前便向金牌發信交代解約回覆,她說:「我聽律師嘅意見,發咗律師信畀佢哋(金牌)之後,已經係解咗約,係律師咁講畀我聽。」到底金牌收律師信後可有回覆時,Theresa呆一呆地表示前日金牌大風向傳媒的聲明已經是回覆,但記者質疑聲明內容並不代表接納解約,她則說:「我發嘅律師信係有法律效用,我可以簽新公司,我因為聽晒律師嘅意見,做晒自己嘅手續,我家解咗約。」
Theresa花在諮詢律師費用,星皓可有提供協助?她說:「舊公司嘅事希望可以自己解決,新公司非常支持將來嘅發展,我家想專心工作,其他嘢交晒畀律師處理。」身邊的Polly插嘴:「唔一定要打官司,仲有其他方法解決,雖然我哋唔清楚簽星皓之前嘅事,但係我哋已經鋪好路,安排佢嘅發展。」

全家支持轉新公司

Polly還否認星皓曾給予Theresa一筆生活費,Polly說:「我哋啱啱先簽約,而且呢件事亦啱啱先發生。」問到Theresa會否擔心被指反骨時,她說:「我都係有原因先離開,多謝公司對我嘅栽培,我有我嘅原因。」
Theresa這次跳槽,獲全家支持,其姊傅娜昨日接受電話訪問時說:「對於Theresa同公司解約嘅事,家人會全力支持佢,家我個妹會放鬆心情去面對挑戰。」
採訪:何慧斯、林妃
攝影:黃文成

陳輝虹:同重婚冇分別

傅穎求去,更爆出涉嫌違約風波,新經理人星皓老闆王海峰力撐愛將,但舊公司金牌大風CEO陳輝虹卻不願放生,並指會透過法律途徑追究到底。
陳輝虹昨日堅稱Theresa與金牌大風仍有合約,他在電話訪問說:「今朝睇咗報道話Theresa同星皓簽咗約,我哋代表律師都發咗信畀Theresa律師,要求佢哋解釋。金牌同Theresa當日白紙黑字正式簽約,但始終解約問題程序都未完成,如果佢簽約另一間新公司,成件事就變成一個違約行為,等同重婚冇分別,我哋會搵律師跟進,不排除採取法律行動,追究到底。香港係一個法治社會,請傅小姐尊重法律。」對於王海峰指會奉陪到底,陳輝虹也絕不退縮說:「好,咁咪法律解決。」
採訪:丁寧

王海峰:佢係我嘅藝人

星皓日前正式與傅穎簽下8年合約,金牌大風昨則向Theresa發律師信,星皓老闆王海峰昨更力撐她說:「Theresa已經係我公司嘅藝人,家佢同舊公司面臨要對簿公堂,咁公司一定會全力撐佢,喺我立場當然希望雙方可以用一個和平方法解決呢件事,唔使打官司,但如果要打,我哋係會奉陪到底。」

傅穎赴京進修

為了讓傅穎裝備好自己,星皓會安排她在年底返北京修讀演戲和唱歌課程,還會給她演唱公司大製作《唐吉可德》的主題曲。對於有傳聞林嘉欣年底約滿星皓將不會再續約,所以才會簽傅穎助陣,但王海峰否認說:「冇呢件事,嘉欣同我公司會繼續合作。」
採訪:李全

專家話
律師:金牌冇得追究

傅穎的合約由金牌大風和TalentBangLimited共同擁有,但合約問題未解決,她已簽約新經理人公司星皓,昨日更由星皓高層陪同出席公開活動,此舉有違約之嫌。
Theresa早前向金牌大風要求解約,CEO陳輝虹曾指金牌願無條件解約,Theresa表示已透過律師回覆接受解約,到底這些「隔空承諾」可具法律效力?律師黃國桐昨日說:「陳輝虹向傳媒講嘅嘢,已算announcement(宣佈),等同聲明,同傳媒講嘢就等同全世界講。Theresa單方面經律師向金牌大風發信接受,代表Theresa喺法律程序上係做咗解約嘅動作,可以唔需要再簽解約書。」金牌大風是否仍可循法律途徑追究Theresa違約?黃國桐說:「冇o架啦,因為Theresa有實際行動,但反而TalentBang就可以郁佢。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載