蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年12月27日

娛圈360:斌仔、陳積回到香港81

陳積顏國樑(左)與斌仔羅君左由《香港81》做到《香港86》,是香港人的老友記。 劇照

無綫處境劇《香港81》於81年6月啟播,雖然靚仔靚女欠奉,也不是有高知名度演員作牌頭,但卻越做越受歡迎,由《香港81》做到《香港86》,5年拍足1,321集。這齣反映時弊的處境喜劇,現正於無綫經典台重播,此劇不僅寫下當年香港的變遷,劇中懋叔(黃新飾)、覺悟因(李我飾)、順嫂(梁葆貞飾)、康仔(李成昌飾)、陳積(顏國樑飾)和斌仔(羅君左飾)等一個個性格寫實的草根階層,更成為香港市民80年代的老友記。今日,就讓斌仔和陳積與大家話當年。 撰文:戴彩煥

現年57歲的顏國樑,當年在《香港81》系列飾演市儈經紀佬陳積入型入格,到今天,街坊市民仍是積哥前積哥後相稱,教人差點忘記他本姓顏,名國樑。雖然陳積去年約滿無綫後轉行到內地教太極拳,但對香港一切仍十分關注,包括當年在《香港81》系列中相處整整5年、飾演其好細佬斌仔的羅君左兩度截肢的消息。
這天,陳積專程到九龍醫院探望斌仔,昔日相依為命的好兄弟,一見面即來個情深擁抱,互相問候,雖然沒有粵語長片般兄弟久別重逢熱淚盈眶的感人場面,也沒有激勵人心的鼓舞說話,但整整3小時間,卻如時光倒流,有數之不盡的美好回憶。在大佬陳積面前,斌仔回復開朗健談的本色,兩兄弟齊齊話當年,越講越興奮,秘聞更越揭越多。
接拍之初,可曾預期過反應如此熱烈?陳積說:「冇,只係諗住有得撈,日日有騷爆就好開心。以前每朝早8點收劇本跟住對稿,9點化妝後10點就入廠拍,拍到6點收工。個個好準時,遲幾分鐘都要見珍姐(監製曾勵珍)解釋,我就見得最多。」

導演鬧偉仔死蠢

斌仔說:「嗰陣時我成日去蒲,但晨早7點未夠就返公司坐喺度,因為個個都知我蒲,所以我寧願瞓少啲都唔想俾人話遲到,蒲到天光就直接返公司。」陳積說:「家啲人就話拍劇飛紙仔,我哋當年直情係飛劇本,日日返工都成份劇本掟埋你度。」
《香港81》越做越紅,不少紅星均樂意客串演出,斌仔最深刻一次是跟梁朝偉合作,他說:「嗰集梁朝偉做我同學,講佢去我屋企住一日,點知拍嗰陣佢叠住我個位,導演戚其義就喺上邊控制室叫佢企過少少,點知叫極偉仔都仲係遮住,阿戚以為自己閂咗個floor咪,就喺度鬧佢:『×!咁×蠢!』全廠人都聽到,梁朝偉望住阿戚話:『你話我呀!』嘩,幾鬼瘀呀。」
該劇以快餐店做背景,加上幾乎日日拍開飯場面,演員理應經常飽口福,但斌仔說:「俾李家鼎(飾演阿威)攞晒。」陳積說:「通常拍完啲食物就會倒,佢(李家鼎)話唔好嘥,畀佢攞番去餵狗喎。」斌仔說:「每次佢都叫人畀兩個膠袋佢裝,我哋想夾多嚿都唔得!」
原來當年李家鼎加入這個大家庭,與康仔(李成昌飾)被雪藏有關,斌仔說:「康仔拍電影《彩雲曲》冇同珍姐講,嗰次珍姐鎖晒門嚟鬧,佢問康仔:『點解你拍咗《彩雲曲》一個shot都唔同我報,你同我報我唔會唔畀你拍,你係咪唔想撈呀!』點解康仔拍呢?因為黃造時有份做,英雄難過美人關,佢哋讀訓練班已經一齊,卒之康仔入咗雪櫃,搵李家鼎入小食店度做,到康仔喺雪櫃走出嚟,佢哋拍開場序幕真係叫康仔喺雪櫃走出嚟。」

拍攝5年名利雙收

5年來演同一角色,斌仔和陳積坦言當時感覺好攰,陳積說:「成日諗住出去拍劇,因為成日見隔籬廠黃日華、苗僑偉佢哋拍完部劇又去登台搵大錢,返到嚟又金鏈又DinersCard,明明上年見佢哋用緊ETC,返嚟就Diners,點樣唔令我哋對眼『登』一聲。」《香港86》於86年6月播映完畢,斌仔當時興奮到大叫。
想當年,陳積與斌仔越講越興奮,這5年在溫室的日子,兩兄弟回味無窮,斌仔說:「改變咗我一生,好似軍訓咁,令我知道乜嘢叫做演戲,同時亦識咗好多真朋友。」陳積也認同說:「呢5年係我人生轉捩點,名利雙收,但當年成日恨跳出去拍其他嘢,諗番轉頭真係身在福中不知福。」

李我:當年人工最高係我

李我(原名李晚景)是著名廣播人,不過他在《香港81》中飾演的算命先生覺悟因更令人留下深刻印象。李我叔雖然年屆88,且07年曾在家中不慎撞到頭部而動過腦部手術,但訪問當天依然聲如洪鐘,精神奕奕。

曾勵珍哭求出山

李我日前接受本報記者訪問時說:「我第二次退休之後,阿珍(曾勵珍)挽住個生果籃同劉天賜上屋企搵我,喊住話:『你唔好唔做,你唔做我就冇監製做o架啦。』最初簽1年,卒之做咗5年,大家好似一家人咁互相照顧,冇是非,好融洽。」
「蘇小姐(梁碧玲飾)直情當我係佢爸爸,拍外景都會用把傘遮住我。放工後佢哋喜歡去我屋企食飯傾偈,好似一個大家庭咁。食晚飯多數我請客,因為人工最高係我,有大食大,家阿珍間中都會約埋大家一齊聚吓。」

阿梅星爺串星拱照

《香港81》系列不時邀外援客串添生氣,至後期則邀紅星助陣為收視救亡,張國榮、苗僑偉、梅艷芳、汪明荃、沈殿霞、甄妮等均曾客串演出。
其中梅艷芳飾演蘇小姐好友阿芳,本是茶莊太子女,但醉心時裝設計,為逃避繼承父業而離家出走投靠蘇小姐。苗僑偉則飾演阿萍初戀男友,在86年6月《香港86》最後一集與阿萍結婚,大團圓結局。
劉德華曾因拒續約無綫,被放逐到該劇演出歷時一個月,扮演康仔的朋友;周星馳和吳鎮宇讀訓練班時也曾被派往實習飾演斌仔的同學。

話你知:順嫂享福 康仔出位

銀禧小食店老闆懋叔(黃新飾)
99年在無綫退休,同年11月4日病逝,享年73歲。

順嫂(梁葆貞飾)
年前約滿TVB後不再續約,不時加、港兩邊飛,與女兒和兒子生活。

康仔(李成昌飾)
無綫合約藝員,近年在劇集《溏心風暴》和《巾幗梟雄》演奸人出位。

懋叔女兒阿萍(梁仲芬飾)
拍完《香港86》後嫁到美國,丈夫為外籍人士,婚後誕下兩子。

經紀陳積(顏國樑飾)
去年約滿無綫後轉行教太極拳,在內地和香港開班授徒,與太太霍潔貞搬往內地居住,由昔日市儈經紀變成趙堡太極拳第13代傳人。

斌仔(羅君左飾)
現年50歲,今年9月因糖尿病兩度截肢,近日獲無綫續約兩年。

算命先生覺悟因(李我飾)
拍完《香港86》後退休,不時與太太蕭湘出席公開活動。

覺悟因秘書蘇小姐(梁碧玲飾)
拍完《香港86》後,嫁給台灣富商之子,誕下兩女後移居新西蘭。

垃圾婆六婆(鄭孟霞飾)
著名劇作家唐滌生遺孀,2000年11月病逝,享年94歲。

牛生(焦雄飾)
02年因無綫裁員而不獲續約,據悉現居內地樟木頭。

牛太(韋以茵飾)
離開無綫後,隨丈夫到台灣及馬來西亞工作,後移居加拿大,最近與丈夫移居上海。

銀行主任阿Dee(熊良錫飾)
早年移居澳門,現擔任澳門賽馬會馬評人。

阿Dee老婆阿May(韓馬利飾)
現為無綫合約藝員。

資料來源:《蘋果》資料室

《香港81》小八卦

●銀禧小食店於銅鑼灣禮頓道1號。
●最初以9名男女演員為骨幹,後曾加入劉丹、賈思樂、陳嘉儀和黃造時等,但因被批評新不如舊而全部換走,並加入牛生牛太。
●陳積經常嘲笑斌仔攻讀人類學,指他「研究猩猩搵唔到錢」,結果引起中文大學不滿,去信無綫投訴。
●《香港81至86》幕後精英如雲,徐遇安、戚其義是導演,黃偉聲為徐遇安助導,陳慶嘉和曾謹昌任編劇。
●順嫂梁葆貞被視為師奶典範,不少人遂用順嫂來作為師奶稱號。
●飾演順嫂丈夫順叔的陳泉,在加拿大擁有多個大型停車場,早年無綫及電影公司租用的所有外景車(俗稱全通車),全是陳泉公司旗下,據知其身家近億港元。
●董驃外甥熊良錫加盟《香港82》,飾演銀行大堂經理阿Dee,韓馬利飾演其妻阿May,熊良錫其後到亞視主持賽馬節目,無綫遂安排其角色被賊人打劫銀行時開槍殺死作交代,韓馬利也無緣再繼續演出。
●《香港81》推出時的宣傳口號:「翡翠六月五條龍,電子新聞齊出動,青春活潑荳芽夢,香港81最輕鬆。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載