› 選擇地區
三藩市
紐約
洛杉磯
其他美國地區
香港 台灣 北美
 
2010年01月15日

阿Paul率80後藝人反高鐵

武廣高鐵早前已經通車,當局以免被邊緣化為由,要求盡快撥款669億建香港段。設計圖片

政府漠視菜園村居民感受及環保生態,草率硬銷近乎零諮詢的高鐵方案,留下千個問號之餘,更激起由80後組成的反高鐵大聯盟連場抗爭。立法會財委會今、明兩日將召開第三次審議高鐵撥款申請的會議,669億公帑去向將有定案。圈中人對高鐵問題同樣深表關注,60後的黃貫中(Paul)昨挺身而出,轟政府一意孤行,寸曾特首好大喜功,80後藝人周秀娜、歐陽靖(MCJin)及周柏豪等也群起和應,對高鐵巨輪齊聲說不。採訪:葉雪

《反高鐵派》
黃貫中(64年生)「係自我邊緣化」

我覺得最後政府會對起高鐵一意孤行。曾蔭權咁做無可厚非,但對我嚟講好似紀念碑,佢喺任內做一個偉大建設,為香港帶嚟更多錢,啲錢一車車咁運嚟,有少少咁hardsell我哋,用呢個方法係好嘅話,維多利亞港填平去吖,幾方便o架。但反思,錢係咪一切呢?起高鐵拉近兩地距離,但拉遠咗人民同政府心理上嘅距離。我唔係反對,但政府要做好完善規劃,做更多諮詢,忽然喺咁短時間內決定,係咪要人有我有?呢個行為係香港自我邊緣化,為求自我不擇手段一意孤行,好多嘢唔係拆咗可以彌補,香港有好多可愛嘅地方,係需要努力保護。80後家做緊嘅嘢,政府係唔會因為你哋跪喺度而放棄,與其膝頭痛,不如做第二啲嘢,唔好太激進,盞畀藉口人哋抗拒你。

周秀娜(85年生)「何必博呢一鋪」

我唔覺得起高鐵會快好多,反而先使一筆未來錢,669億真係唔係一個細數目。全球經濟都未算好好,何必要博呢一鋪?如果有呢筆大錢,點解唔拎去幫助有需要嘅人,尤其係長者同學生,家我身邊好多人都話香港冇出路,唔通叫佢哋去起鐵路咩?我最想政府將呢筆大嘅資源投放喺真正有需要嘅人身上。

MCJin(82年生)「最關心菜園村」

我一直有留意高鐵呢件事,起唔起係另一回事,我反而最關心菜園村居民嘅生活,因為之前我去過菜園村拍嘢,嗰度好寧靜環境好好,所以好擔心如果起高鐵會影響佢哋生活,希望政府一定要顧及菜園村居民嘅感受。

周柏豪(84年生)「建鐵路非必需」

香港好多人冇飯食,呢個時候有一條唔太需要嘅鐵路要興建,自己諗吓啦。我唔係反,好多朋友唔知道建高鐵係乜,所以我將起高鐵嘅link放上blog畀朋友睇,自己都唔係好認識清楚,保持中立態度。

胡定欣(81年生)「金額真係唔細」

家香港人有好多方法返內地,動用幾百億起高鐵,需要程度係咪去到咁緊要呢?政府要三思,多啲聆聽唔同聲音,收集外界多啲意見,因為起鐵路嘅金額真係唔細。我亦都希望80後要冷靜啲去解決問題。

黃宗澤(80年生)「破壞生態環境」

如果起高鐵會破壞生態環境,我絕對反對。其實以經濟嚟講,起高鐵係好事,會造就好多就業機會,將來會方便市民往返中港兩地,但首要條件係保護環境,不過有時經濟同環境生態又好難做到兩全其美,希望盡量協調啦。

《撐高鐵派》
詹瑞文(65年生)「拉布拖垮件事」

我贊成起高鐵,但家政府呢個處理方法唔完美,尤其拉布戰就拖垮咗件事,作為港人,我對議會有啲灰心,唔想演變成台灣咁。80後嘅年輕人得20幾歲,佢哋覺得自己喺社會上好重要,用激情回應件事,其實唔同人有唔同聲音,都係想令人留意件事。

郭晉安(64年生)「香港係要前進」

對我嚟講係受惠,我哋每年都被抽稅,我個仔第日長大,對佢都方便,可能對某啲村民會受害,要整歪啲嘢或者搬走,但每一樣嘢都有人反對有人贊成。香港呢個巨輪係要前進,希望80後唔好太激進,唔好互相傷害,咁係好愚蠢嘅行為。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載