蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年02月10日
馬上成為壹會員

馮仁昭四圍超:拉姑買衫發火 老公即縮 - 馮仁昭

狄波拉快將有孫仔抱,加上農曆年在即,近日都忙到甩轆。前晚拉姑同老公鬍鬚Kong去中環趕辦年貨,買花又買衫,不過中途拉姑突然爆火,搞到老公冇晒表情,非常冇癮。
當時一身綠嘅拉姑同老公由工人陪同下,去中環一間花店選購蘭花,拉姑精心挑選,鬍鬚Kong就負責傍實、挽袋同畀錢。現場見拉姑揀定後就同店員訂花,之後兩公婆路經一間女裝店時,百忙中嘅拉姑忽然興起,拖住老公掃貨。

試衫不拘小節

雖然店中大部份服裝花喱花碌,但向來潮嘅拉姑,所揀嘅連身裙、短袖衫同褲仔之類都係大紅色,相當應節。拉姑試衫亦不拘小節,即場除外套露出入面嘅低胸衫,然後試着幾件短外套,佢每次試衫都會揸一揸胳肋底,研究不見天位置會唔會唔舒服,到揀好後,拉姑又會驗吓啲衫同埋放喺身上照吓,幾經思量先拍板由老公畀錢。
前後等足一個鐘嘅鬍鬚Kong已經等到吽晒,一面呆滯嘅佢畀錢後,喺女店員手上接過單據同信用卡之際,拉姑突然離奇發火,一手搶過單據再質番畀個女店員寫嘢,之後仲黑面哦老公。塊面越嚟越沉嘅鬍鬚Kong,拎住老婆袋戰利品,粒聲唔出行去附近上車鬆人;反而拉姑戰意高昂,繼續同工人逛街。睇嚟拉姑嘅善變,都拍得住呢期忽熱忽冷嘅天氣。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載