蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年05月20日

「我阿哥好憎佢」
家強警告林楚麒咪扮未亡人

下月是Beyond主音黃家駒逝世17周年死忌,當年以未亡人姿態出席喪禮的林楚麒,卻巧合地於近日復出參演音樂劇,又屢將家駒掛口邊。家駒胞弟黃家強昨扯火怒轟林楚麒扮未亡人博宣傳,更直斥:「阿哥好憎佢,我都好憎佢。」

黃家駒93年意外身亡,與他拍過拖的林楚麒當時以未亡人姿態出席喪禮,但不久又銷聲匿迹,至近日年逾40的她宣佈復出,於本月尾聯同莫鎮賢演出音樂劇。連日來林楚麒狂接訪問,自稱早年曾與家駒訂婚,又謂為他梳起唔嫁,不過家駒胞弟黃家強昨於新城電台宣傳下月的慈善演唱會,提到林楚麒復出時,他即收起笑容說:「叫佢唔好亂講嘢啦,小心啲!」

「佢好對唔住我阿哥」

問家強會否採取法律行動,他激動地說:「我又繼續講嘢,咁佢就死。」是否與林楚麒冇偈傾?他即說:「叫佢唔好講大話啦。」所指是林楚麒自稱為家駒梳起唔嫁?家強說:「拍拖係有,但分咗手十世啦,人哋都唔喺度,扮未亡人做乜,佢知自己乜事o架。分咗手後,佢(家駒)之後都有兩個女朋友,唔該佢啦,please!」
林楚麒是否不應借家駒做宣傳?家強炮轟說:「梗係唔好啦,做乜嘢扮未亡人,仲要扮阿哥係佢last一個,邊係啫!我只想澄清唔好誤導歌迷,同埋佢係好對阿哥唔住先分手。」林楚麒有第三者?家強說:「總之好對我阿哥唔住,原因唔想講,因為我阿哥好憎佢,所以我都好憎佢,夠啦!家我阿哥唔喺度講唔到,所以我代阿哥講,唔好話同阿哥訂咗婚,如果係攞隻訂婚戒指出嚟,佢只係阿哥其中一個。」
林楚麒日前接受本報訪問時繼續揚言不婚:「咁多年嚟慣咗一個人生活,亦都好享受,我希望呢個小小空間可以保持。爹哋成日想我嫁,但唔使諗,我唔嫁。」問她曾否拜祭家駒時,她卻尷尬說:「私人嘢唔想答。」
採訪:溫敏芝、馬建華
攝影:陳俊強

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載