蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年05月22日

幕後玩家:祖兒伯樂 叱咤K壇血淚史

Neway卡拉OK當今獨大K壇,也要多得前人開山劈石。80年代將日本卡拉OK文化引入香港的第一人,名叫劉麗萍(Apple),前BigEcho老闆娘。90年Apple姐開辦全港首家卡拉OK連鎖店,稱霸稱雄收入過億,且還發掘了天后容祖兒。
Apple姐上半生追逐名利,但世事無常,她將祖兒轉贈楊受成,隨後沙士更令她輸得血肉模糊,婚姻破裂,千金散盡,自我懲罰蝸居小食店避世。今天,Apple姐終於絕地翻身再戰商界,坐於女王辦公室的她憶述傳奇卻一派淡然,並說:「我走時咪又係乜嘢都帶唔走。」驀然回首,也曾頂過半邊天。 撰文:朱倬誼

談到事業,Apple姐說:「我屋企好窮,我9歲就幫阿爸落地盤擔泥,多病嘅阿妹又生腦瘤,30幾歲就走咗;阿爸40、50歲已經典喺床度,佢糖尿病好多後遺症,所以我成日出入醫院。細個時好想做醫生,但命運嘅轉變,畀我先投入廣告界,好有成功感,但當我見到卡拉OK,直情係個天賜畀我。」
這是Apple姐的自我簡介,她是香港卡拉OK業的第一代功臣。來自草根的她有4兄弟姊妹,A-level畢業後,她扛起整頭家,白天在黃頁分類做營業員call廣告,晚上則去合和旋轉餐廳替客人影鎖匙扣照片,一星期做足7日。從冇到有,23歲開設廣告公司,25歲賣卡拉OK器材,28歲開第一間BigEcho、也是全港首家卡拉OK連鎖店。可惜,03年沙士肆虐,她輸光輸淨,一敗塗地。
半世人如坐過山車上上落落,Apple姐重提舊事卻淡然得像訴說別人的故事:「90年我喺尖東幸福中心開咗第一間BigEcho,第一年已經賺1,800萬,高峯期開18間,每年營業額2億,但好辛苦,壓力係要贏,要做霸主,做No.1,嗰行嘅leader。」

慧眼發掘容祖兒

80年代末期,Apple姐於歌唱比賽中發掘了當年毫不顯眼的容祖兒,其後她還將祖兒無條件轉簽英皇老闆楊受成,她說:「我冇收楊生錢o架,佢有叫我開價,我開得高你唔會畀,開得少又冇用,不如你應承我捧紅佢。我覺得祖兒有潛質,把聲好靚,同埋我都冇乜時間做經理人,始終都係做卡拉OK。」
祖兒蟬過別枝後大紅,人人都說Apple姐走寶,但當時她致力卡拉OK大業,捧新人形同小事一則。直到沙士打到嚟,她咬緊牙關死守BigEcho,奈何終歸還是一鋪清袋,Apple姐說:「之前我嘅拍檔都係日本BigEcho,02年後我賣咗一半畀雲頂集團,有次我去馬來西亞同佢哋開會,睇電視新聞報告時,董太(董建華太太)着住生化衣出嚟,大鑊啦!佢哋即刻唔敢見我,驚我傳染,香港疫埠喎,『你頂住先啦!』咁我自己頂囉!唔夠一年錢冇晒,我已經傾盡,物業賣晒,03年暑假後BigEcho就逐間冇晒。」
一年內賣車賣樓,錢又冇舖又冇,BigEcho尖東舖業主、玩具大王蔡志明倒有情義,肯打本給Apple姐重振聲威,可是她只選擇了租借蔡志明位於長沙灣的一個小舖位,開設日本料理店。後來蔡志明將尖東舖改建為日本食肆小東京,曾建議Apple姐打理,但被她婉拒:「我唔想返尖沙嘴,想匿喺鄉下,個人經歷咁多,不如去番深水埗,呢度係我出世嘅地方,檢討自己行咗40年做咗啲乜嘢。喺日本菜嗰度呢,雖然有請夥計,但我好似懲罰自己咁,由朝做到晚,朝早買菜,煮係我,收檔又係我,喺不停勞動中反而頭腦清晰。」

嘗盡甘苦體會多

要紆尊降貴蝸居小食店避世,有着《歲月神偷》老香港奮鬥精神的Apple姐依然帶笑看天下,惟獨慨嘆另一半不能共患難:「有段時間我有啲朋友先後死咗,覺得人生好化學,所以自己好想令人健康,咁啱有隻健康水搵marketing,我同老闆自薦,咁又開始忙,擺低間餐廳畀日籍前夫睇,佢唔識管理,晏晝瞓覺,廚師又跟住瞓,啲人越嚟越懶,生意越嚟越差,咁落去執笠啦,我咪全力搞健康水,其後又做保健品代理,到舊年代理水機同健康珠鏈,家冇乜錢賺,但開心囉。」

翻撻舞王怕再婚

當卡拉OK女王遇上香港舞王─即劉麗萍+麥德羅=戀人一對。原來他們年輕時候拍過4年拖,Apple姐兩度離婚後重遇舊愛,兩人一拍又是4年,並於去年訂婚。
歲月輕狂時,Apple姐以為舞王沙沙滾,早年已嘗離婚的她決定飛起麥德羅,選擇與日籍的西川再婚,Apple姐日前說:「西川個人老實,我都好鍾意麥德羅,但佢以前好多女朋友,我會呷醋。你有個成績表喺我度計分,最後佢零雞蛋。」

呵護備至甜到漏

第二段婚姻,老生常談的因了解而分開,4年前Apple姐和麥德羅因緣際會愛火重燃,她說:「佢好錫我啲仔女,好多屋企嘢又幫我做晒,夜晚我咳兩聲啫,佢就『你有冇事呀BB?我落街買川貝枇杷膏畀你。』」
育有兩女一子的Apple姐承認麥德羅曾求婚,但她實在怕怕:「都係一張紙,大家一齊開心OK啦。」對於男友,她讚不絕口:「我喺BarCity睇佢做騷,佢好似喺紅館咁,又擘一字馬又空翻,好敬業樂業。」
攝影:仇志德、陳慧安

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載