蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年06月18日
馬上成為壹會員

A貨李小龍內地升呢
陳國坤夥拍星爺收平啲

陳國坤因為貌似李小龍,帶挈他北上拍攝劇集《李小龍傳奇》。

陳國坤有港產李小龍之稱,撼贏眾多對手接拍內地電視劇《李小龍傳奇》,令他身價上漲進軍內地。問陳國坤日後會否與一手提攜他的周星馳合作?他即說:「佢肯請我收平啲!」

亞視外購劇《李小龍傳奇》現正播映,劇集早年由央視拍攝,選角起用了翻版李小龍陳國坤,該劇在內地播映後廣受歡迎,他自認比起當年在香港拍電影時身價升呢不少,故近年專注內地發展及投資製作。

「一日硬食幾百拳」

問陳國坤日後會否與舊老闆周星馳合作?他日前接受本報記者訪問時笑言:「佢肯請我收平啲,喺香港用家內地畀我嘅價錢,可以請更有知名度,所以近年都喺內地發展,又唔會講價。」
《李》劇在亞視推出,陳國坤有所期盼,他說:「李小龍唔係講普通話,因為喺內地拍配咗普通話對白,加上今年係李小龍70歲冥壽,套劇喺香港播更有意思。」李小龍最耍家雙截棍及功夫,對陳國坤而言他耍雙截棍自小玩到大,難度不算最高,相反拍攝打戲時就相當辛酸,拍攝《李》劇時,陳國坤每日硬食對手拳腳,令他記憶猶新,他說:「啲演員好多都係武術同打擂台高手,拍打戲唔止打一拳,一日硬食超過幾百拳,打到拳頭好似叮噹雙手咁,左邊膝頭韌帶撕裂,骨膜炎呢啲都經常有,所以受傷係最大記憶。」

做逾千situp練腹肌

陳國坤暫時不會接拍同類型角色,因為太多人開拍,而且拍攝前要作好一段時間準備,他說:「辛苦在要練腹肌,每日起碼做過千下situp加引體上升。」李治廷即將拍攝東方電影與星皓合作的電影《李小龍傳》,狂操腹肌,陳國坤表示有留意相關消息,他說:「近年喺香港李治廷係最似李小龍,又後生又靚仔。」
採訪:卓寶花 攝影:黃偉雄

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載