› 選擇地區
三藩市
紐約
洛杉磯
其他美國地區
香港 台灣 北美
 
2010年09月07日

馮仁昭四圍超
忽爆《倩影》真身依然當紅 蔡楓華:啲中女咁犀利 - 馮仁昭

好耐冇見嘅蔡楓華現身接受夏妙然嘅電台節目訪問,大談昔日威水史,精神都唔錯。

好耐冇見兼當年有紅唇王子之稱嘅蔡楓華,最近接受夏妙然主持嘅港台節目《光輝歲月》訪問,嚟緊會陸續咁播出,而電台發咗張蔡楓華同夏妙然嘅合照,只見佢戴住cap帽同黑超,着件polo衫同高腰褲,精神都唔錯。訪問開始冇耐,蔡楓華話自己受到好多流言蜚語,但佢強調自己除咗對眼有事外,身體好好,更加冇精神病㖭。
節目名叫《光輝歲月》,當然要提吓蔡楓華嘅威水史,所以點可以唔提當日大熱嘅一曲《倩影》,蔡楓華自爆原來呢首歌係寫一個女星嘅背影,主持追問係邊個,佢話:「唔講得,佢仲紅緊仲喺度,估唔到啲中女咁犀利。」據聞呢個女星就係麗的時代嘅關之琳。

嘆難搵終身伴侶

當年歌、影、視同播瓣瓣掂,但蔡楓華話冇錢賺:「我同鍾楚紅拍過一套戲做男主角,但都只得4萬5千蚊,好少囉。」佢講嗰套應該係82年嘅《薄荷咖啡》。另外,蔡楓華又自稱係全港唱酒廊嘅歌手中最高歌酬喎,雖然係咁,其實佢唔想唱。
除咗歷史外,聽眾都想知蔡楓華嘅近況,原來無綫搵佢上《勁歌金曲》,蔡楓華表示:「應該會喺9月上,我希望以最佳狀態出嚟,真正嘅復出,但千祈唔好話我大年紀,好多我嘅前輩都仲唱緊。我要戰勝幾樣嘢,我會好珍惜,講真冇蔡楓華就冇《勁歌金曲》。」
咁感情方面又點?蔡楓華好老實話成十幾年冇拍拖,佢解釋:「我喺內地成日登台,好多機緣,但我成日巡迴東奔西跑,根本冇固定,總之終身伴侶難搵,如果貪錢貪名氣嘅送都冇用喇。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載