› 選擇地區
三藩市
紐約
洛杉磯
其他美國地區
香港 台灣 北美
 
2010年09月10日

Rosemary伯樂嘆後生貪玩
鄧達智:都幾大劑

鄧達智(右)寄語Rosemary出事後要醒覺,旁為負頸傷出席活動的林峯。

【模界醜聞之恩師心痛】Rosemary涉嫌藏毒兼引發交通意外不顧而去,設計師好友鄧達智昨日透露Rosemary原定出騷,但因赴LA而推job,不料出事。他表示擔心多於心痛,維護Rosemary指她本質不壞,希望事件令她醒覺。

相關新聞:LisaS.證模特兒吸毒周秀娜斥Rosemary唔自愛

當年Rosemary14歲出道,處女騷即為時裝設計師鄧達智(William)上陣,兩人更成為好友,時裝界前輩William多年來,無間斷搵Rosemary行騷。鄧達智昨日在圓方為Paul&Joe時裝活動任搞手,原先都請了Rosemary出騷,夥拍林峯亮相宣傳,最後卻改為林莉配林峯。

「希望佢醒啲」

鄧達智說:「原先請Rosemary,後來佢話趕住去LA,話有musicproductionhouse搵佢,有啲發展傾,所以推咗,我就搵林莉頂替,如果佢接咗我個job,可能就唔會有事囉!」William早在96年已找Rosemary在文華夥拍當時得令的名模馬詩慧、翁為德行騷,多年知遇之情令兩人關係密切,他說:「回想番,佢係當時最細嗰個,我係睇住佢大。」
可會對Rosemary失望?鄧達智說:「家好多後生仔,玩開就忘記咗自己處身喺危險嘅情況,佢今次交通失事同俾差人查牌,都幾大劑,不過其實有啲仲大鑊,好似KateMoss、NaomiCampbell咁。」心痛Rosemary闖禍?他說:「擔心多過心痛!以家啲o靚仔o靚女嚟講,其實佢算係檢點,係一個表裏一樣嘅人,唔係特別差,希望佢唔好有下次,希望佢醒啲啦。」鄧達智繼續為Rosemary講好話,指她工作好交帶,從冇失場,他說:「我對佢有信心,希望除咗工作,未來佢喺生活上一樣可以做到100分。」

相關新聞:AnaR.憂Rosemary母傷心

林莉聞訊震驚

同場林莉對Rosemary出事表示震驚,曾和Rosemary在美國工作的她說:「佢個人好靜,好nice,似鍾意返屋企煮飯仔嘅人,feel唔到佢係咁。」
採訪、攝影:張俊銘

全城熱話--關楚耀:影響社會風氣

Rosemary在美涉藏毒及撞車不顧而去被捕,娛圈毒風再起,旋即成為昨日的娛圈熱話。

去年初在日本藏毒被捕的關楚耀:「其實件事之後,一直覺得有啲嘢放唔開,所以無時無刻提醒自己做嘢最穩陣。發生呢啲事的確影響整個社會,好多風氣影響咗,不過最重要係點樣面對自己。」

前夫郭子輝曾被指有不良嗜好的陳嘉容:「好突然,唔知應該點幫手,食呢啲嘢好唔啱。」

馬詩慧:同佢工作時冇異樣,可能玩時個人open,亂咗性好難講,但佢唔係一個壞女仔。吸毒只係一段時間快感,咁做好可惜。

楊崢:Rosemary好叻好聰明,我覺得佢今次係一時衝動,處理得唔好,總之犯法嘅事係唔啱,希望佢吉人天相。

莊思敏:好surprise,佢個人幾好,家香港有好多地方唔食得煙,我知佢想連煙都戒埋。Rosemary件事我唔清楚,又唔知啲藥係咪佢。

戴妮廷:我一星期前打過畀Rosemary,今次可能係壞朋友帶壞佢,咁啱撞車又俾人發現,好唔好彩。所有人都會犯錯,應該畀機會佢,唔值得日日懲罰佢。

黃秋生:美國人識你係乜水,呢啲情況相信罰幾千蚊保釋就得,啲嘢都唔知係咪佢。接觸毒品梗係唔啱,遲啲香港連香煙都被列為毒品。

曹格:乜嘢工作都有壓力,每個人都有低潮,無論如何毒品都係唔掂得,我就從來都唔掂,係朋友都知我對呢啲好反感。

毒海藝人

年份:02年6月
藝人:蘇永康
在台灣工作時,與安雅等友人到夜店消遣,被警方發現身上攜有「搖頭丸」,二人的尿液被驗出呈陽性反應。蘇永康遭台灣當局判勒戒11天後提早獲釋,安雅則被判勒戒10日。

年份:02年12月
藝人:杜德偉
在跑馬地夜店消遣遇警方查牌,在其身上搜出大麻,裁定藏毒,罰款4,000元及留案底。

年份:04年4月
藝人:周永恒
在觀塘寓所大廈外被警方毒品調查科截查拘捕,在身上搜出20粒懷疑「5仔」毒品,被判感化18個月。

年份:04年6月
藝人:吳浩康
在尖沙嘴柯士甸道被警方查問期間,在身上發現藏有1.2克可卡因粉末,被判罰款5,000元及留案底。

年份:09年2月
藝人:關楚耀、衞詩
兩人在日本東京旅行,被警方發現身上藏有大麻,關楚耀被關押在葛飾區東京拘置所,至第33日才獲釋返港;衞詩被囚60日後受審,被判入獄兩年,緩刑三年。

資料來源:《蘋果》資料室

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載