蘋果日報 | APPLE DAILY
› 選擇地區
三藩市
紐約
洛杉磯
其他美國地區
2010年10月23日

林嘉欣誕6磅半得得B女

恭喜恭喜,今年6月在加拿大秘密結婚的林嘉欣,上周五(15日)於溫哥華為丈夫袁劍偉產下6磅半B女Kayla。原來,嘉欣一直希望自然分娩,親嘗生BB的感覺,可惜臨盆前BB臍帶纏頸,她惟有即刻開刀。嘉欣昨日接受本報電話訪問時說:「雖然有少少失望,唔可以體會到順產嘅感覺,不過最緊要係BB嘅安全。」

相關新聞:姓名解碼埃及女神降世

現年32歲的林嘉欣於加拿大溫哥華時間上周五(15日)開刀產下6磅半B女,母女平安。剛榮升媽咪的嘉欣,昨日在溫哥華接受本報長途電話訪問,大談初為人母的感受。雖然嘉欣生完BB已有一個星期,但因為她開刀後傷口不時隱隱作痛,以致說話時氣若游絲。

臍帶打棘急急開刀

嘉欣說:「BB係女嚟嘅,出世重6磅8安士。我係上個星期五15號生嘅,起初想順產,甚至諗住唔打麻醉針、唔整止痛,用最天然嘅方法生BB,但後尾都有少少問題,因為見到BB嘅臍帶棘咗條頸一個圈,臍帶壓住條頸,都幾危險,所以醫生就『拿拿淋』幫我開刀生個BB出嚟囉。自己有少少失望,唔可以體會到順產嘅感覺,不過我覺得最緊要係BB嘅安全。」
由於剖腹產女,嘉欣表示傷口現時仍隱隱作痛。她說:「當日麻醉藥一過,傷口就好痛,之後我郁一郁身,甚至打個乞嗤,傷口都會痛,家情況已經好咗啲。」
記者問嘉欣BB是否早產時,嘉欣表示並非早產,而是跟預產期差不多。

相關新聞:相士話貴格B女錫媽咪

眼細腿長似足爸爸

昨日嘉欣傳送了兩張B女照片給本報,雖然嘉欣認為女兒眼睛細長似爹哋袁劍偉(Steve),但記者卻覺得B女與媽咪尤如餅印一樣。照片中B女豎起兩手手指,戴起帽子,十分可愛,連嘉欣也忍不住笑說:「似唔似天線得得B?」
談到初生女兒,嘉欣越講越興奮,她說:「佢嘅長度身高有50cm,即係20吋,啲姑娘就同我講話普遍BB係18吋,從來未見過超過21吋,所以佢20吋係比較屬於手腳長、比較高大嘅BB,我聽到都好開心,因為遺傳咗佢爹哋嘅身高囉。」記者指B女長大後可以做model,嘉欣聞言即笑說:「唔會啦,咁辛苦!除非佢真係個人興趣就冇辦法。」
初為人母感覺如何?嘉欣說:「感覺係:『乜個BB係喺我個肚出嚟o架?』一個生命嘅誕生,無論我望住佢又好、餵佢食人奶又好,感覺都係好warm、好開心、好奇妙。」
嘉欣表示,現時B女每兩小時便要餵奶,由於加拿大沒有工人,她便與丈夫分工合作,嘉欣說:「佢負責換片,我負責餵奶。」問到嘉欣生BB當日,其廣告導演丈夫Steve有否入產房拍片?嘉欣說:「喺加拿大開刀係唔可以拍片,當日佢有陪我入產房,我開刀嗰陣佢企咗喺塊布後面,開完刀之後,佢就幫手剪臍帶,跟住BB磅重冲凉嗰陣佢先至可以拍片。」

帶B女返港探親友

嘉欣父母現身在加國照顧坐月的女兒,問嘉欣可打算帶BB返港時,她說:「都想呀,但係家都未夠一個星期,我覺得太細個呀,我諗最快都要等明年囉,因為佢(BB)有好多親戚朋友喺香港,個個都想抱佢。」
身為嘉欣契媽的潘迪華,原來日前已接獲契女喜訊,昨日她在電話中說:「佢早幾日打咗電話畀我,知道佢生咗,我當然戥佢開心啦。但因為我呢幾日身體唔係好舒服,未同佢詳談,遲幾日我會打電話畀佢。」
採訪:戴彩煥

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載