› 選擇地區
三藩市
紐約
洛杉磯
其他美國地區
香港 台灣 北美
 
2010年11月05日

《義海》雙雄豬籠入水
祥仔謀洋房 雯女防稅局

黎耀祥和鄧萃雯孭飛的《巾幗梟雄之義海豪情》叫好叫座,帶挈這對螢幕情侶多了搵外快機會,荷包腫脹。昨日兩人又以情侶檔出席家具店開幕,祥仔明撐雯女和《公主嫁到》的佘詩曼同是今年視后的大熱人選,多了銀機會的祥仔希望賺夠換獨立屋。

無綫熱播劇集《巾幗梟雄之義海豪情》高潮迭起,帶挈同劇演員多了不少搵真銀機會,黎耀祥、鄧萃雯和謝雪心昨日就出席跑馬地一間家具店開幕禮,氣氛熱鬧,現場被擠得水洩不通。

難蟬聯視帝

祥仔指雯女在《義海豪情》中的九姑娘和《公主嫁到》的阿佘將會熱爭視后寶座,但有指頒獎禮時兩女都有工作不能出席,他說:「視后我睇好雯女同阿佘,如果唔係佢哋兩個,我都唔知畀邊個,不過楊怡都做得好好。」問祥仔是否有信心可以蟬聯視帝,他說:「我都攞過,今年就冇咁緊張,我人生成績表都有呢個獎,冇理由年年都係我攞,就算今年再攞,出年都未必係我,冇嘢係永遠。」
祥仔透露視帝獎項視大熱的陳豪、林峯和馬浚偉為勁敵,祥仔懶理爭獎,他希望多銀買間獨立屋讓全家住得舒適,他說:「我都有睇過,但間間都超過2,000萬,我賺嘅錢仲未追到地產上升價,以前800萬賣嘅九龍塘舊居,家升到成千萬,我次次賣都係賣完先升。」

心姐生日忙

獲祥仔力撐的雯女則說:「我當自己攞咗二分一個獎,等我做定半件靚衫先。」記者提議雯女叫無綫安排兩個視后得主,她跟阿佘便可同時獲獎,雯女說:「如果真係,我要度期返嚟。」有指雯女以400萬片酬接拍瓊瑤新劇《新還珠格格》,她說:「之前夠有報道話一年賺得70萬,冇所謂,最緊要稅局唔好追我稅。」
此外,謝雪心昨午先在將軍澳電視廣播城出席完11月星辰,然後再趕往開幕禮,談到本周一剛度過57歲生日,心姐說:「嗰晚係同屋企人度過,之前同咗fans慶祝,珈潁仲開咗張支票話請我去旅行,但係撞啱最近係宣傳期,或者遲啲先出發。」
採訪:張俊銘
攝影:陳順禎

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載