› 選擇地區
三藩市
紐約
洛杉磯
其他美國地區
香港 台灣 北美
 
2011年03月08日

馮仁昭四圍超:
Laughing哥帶挈 宗澤床戰子珊:好狂野 - 馮仁昭

黃宗澤同徐子珊演親熱戲經驗豐富,佢哋仲預告會放盡嚟演。

謝天華之前參演嘅警匪劇做紅咗Laughing哥,由警察至卧底都做得出色,不但令佢有機會憑角色闖到大銀幕,今次無綫再為佢度身開劇《潛行狙擊》,繼續延續Laughing哥嘅角色,仲搵番銀幕情侶陳法拉合作,至於蠱惑仔方面就交畀黃宗澤去博一博。

法拉為天華剪短髮

噚日一班《潛》劇演員喺將軍澳電視廣播城試造型,個個開口埋口都多謝Laughing哥,話令到大家都有工開喎,連前輩都唔例外,搞到謝天華真係好似大哥大一樣。天華今次做番一個有身份嘅差人,不過之後生死未卜,黃宗澤就係跛腳龍頭大佬,同Laughing哥有好多對手戲,關係又好微妙,聽落有啲似電影《無間道》嘅橋段。不過謝天華就話唔係咁簡單,除咗男人戲之外,黃宗澤同徐子珊仲會有好多床戲,宗澤仲話:「我哋之前都合作過,冇當佢係女仔,大家夾定到時會狂野啲。」狂野還狂野,都要小心胡杏兒會呷醋噃。
陳法拉噚日係咁多謝Laughing哥,佢話:「之前劇集我完全冇份,只係電影演過,今次同天華飾演上司下屬嘅關係,要好能幹嚴肅,之後會剪短頭髮,係入行以嚟第一次做警察同第一次剪短髮。」

另外,謝天華同張智霖主演《魚躍在花見》上星期五連播兩集結局,平均收視有217萬(34點)觀眾,最高尾段兩節有成236萬(37點)人次捧場,喺無綫官網點擊率超過180萬,天華噚日試造型時好開心,仲話:「今次張智霖冇得走,有大食大,佢演唱會又賣個滿堂紅,兩場都賺過千萬啦。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載