蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年05月02日

《魔法擂台》掀罵戰
魔術師不甘受辱 上網鬧評判

無綫《魔法擂台》險成真擂台,前晚第五集其中參賽者李浩鋒,疑不甘受評判侮辱,前日將一段自拍片段放上YouTube反擊,聲稱遭判評侮辱,引起網民頗大迴響。不過當日在場的莊思敏力撐評判說:「佢(李浩鋒)講嘢都唔係好有禮貌。」

前晚《魔法擂台》播出第五集,當中獲最低分的參賽者李浩鋒在節目播出後將一段4分多鐘自拍片段放上YouTube,指遭節目評判之一、香港魔術家協會會長譚永銓(Albert)和台灣魔術家協會副會長程廣生(Erick)出言侮辱,由於有關對話在播出街時被無綫刪掉,他指過往不少參賽者也有類似遭遇,所以站出來講出真相。

被嫌水準低嘥時間

李浩鋒在片段中說:「我去到錄影時已經聽到Erick好囂張咁同人哋講:『我第一日已經鬧個參賽者,話你變啲嘢留番嚟煲醋啦。』咁樣鬧人哋都有嘅?」李浩鋒指他表演期間Erick與Albert不停傾偈沒留意他表演有欠尊重。他續說:「我做銀仔魔術時,camera錄得唔夠快,追唔到我隻手,所以要補拍番啲鏡頭,佢(Erick)就話:『你啲技術好有問題,要補拍咁多個鏡頭就知啦,嘥晒我哋評判嘅時間,我趕住返屋企瞓覺o架!』我覺得你真係侮辱緊我喎,所以我先至會講咗句:『咁其實你可以唔嚟吖。』講完呢一句,就發生咗件疑似恐嚇嘅對話,就即係黑口黑面咁講:『你係咪想消失呀?』咁係咪恐嚇我呢?」
李浩鋒再說:「會長(Albert)講嘢其實都好過份,佢話:『玩魔術唔需要啲好華麗嘅道具,所以咪華麗喺件衫(指李浩鋒衣着)?』之後我話:『梗係啦,輸人不輸陣。』森美話:『講到好似嘍打咁喎。』會長就話:『係呀,擂台吖嘛,梗係嚟嘍打o架啦!不過你要識打先得o架,好對唔住,我覺得你唔識打!』聽完我真係好想問佢,但俾森美㩒住咗,我當時想講:『係咪要好似會長你扭屎忽花咁樣先叫做識打擂台呢?』點解你要侮辱我?你侮辱我,我都唔需要畀面你。」

莊思敏:佢唔輸得

當日有份擔任嘉賓的莊思敏,昨日指評判確曾講過相關說話,但力撐評判說:「真係咁講,但我覺得Erick係帶動氣氛,嗰個魔術師技術一般,佢好多甩漏穿崩,導致我哋要補拍,Erick佢哋係苛刻啲,我覺得Erick言語間冇侮辱成份。佢問係咪想消失,意思係問係咪想我變走你,我又唔覺有恐嚇成份,當時氣氛係有小小僵,因為個參賽者又好似有啲怒火,同埋佢講嘢都唔係好有禮貌,呢個男仔好唔接受人哋意見,我覺得問題唔喺評判度,係個參賽者唔輸得。」
無綫外事部副總監曾醒明則回應說:「節目會搵專業人士做評審,佢哋有佢哋獨特風格,可能評語比較直接,令參賽者聽落有啲唔舒服,相信係聽者有意啫。」
採訪、攝影:林妃、溫敏芝

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載