› 選擇地區
三藩市
紐約
洛杉磯
其他美國地區
香港 台灣 北美
 
2011年10月09日

有話兒:吳啟華捧紅老婆食軟飯

吳啟華當年拍劇邂逅初出道的石洋子,結婚多年太太靜極思動想復出,啟華即笑言從此有老婆養。
攝影:陳慧安
髮型:JaneofBeautyTech
化妝:RyanofBeautyTech
場地:皇家太平洋酒店堤岸酒吧及餐廳

吳啟華98年憑《妙手仁心》飾演腦科醫生程至美成功塑造好男人形象,可惜03年在北京拖女夜遊,五年形象一朝喪,負面新聞一大籮。事隔幾年吳啟華娶了年輕21年的長春女星,還添了個寶貝女,但他仍未滿足,最希望太太復出拍戲迅速走紅,從此「打跛腳唔使憂」,自己繼續夜夜笙歌。 撰文:魯萍

吳啟華最近同太太石洋子回港宣傳他們的定情劇《上海灘之俠醫傳奇》,此劇04年在內地播出時名為《俠醫傳奇》,現年47歲的啟華拖着比他更瘦削的太太,從外表看不出原來他倆年齡相距21年。

高調求婚娶嫩妻

石洋子在英皇演藝訓練班畢業,當年初出茅廬的她僅演一個小角色,但快速地跟男主角啟華撻着,一劇定情,拍拖兩年多,在電視節目《舞林大會》中吳啟華當眾跪地求婚,還以為是增加收視的賣點,原來卻是「嚟真的」,婚後翌年還生下一名女兒,取名熙兒。
轉眼間熙兒已經3歲多,啟華夫婦暫無意再追多名家庭成員,啟華說:「唔使急,佢仲好後生,男人冇所謂,生唔係問題,係冇人湊呀!請工人湊又唔放心。佢呀(指着太太)又話要出返嚟拍戲,咁多年冇做嘢又係好悶嘅。」
提到太太拍戲,啟華一臉愁煩,是否擔心太太要跟男對手拍親熱戲?他笑說:「冇所謂,冇限制,為藝術犧牲都得,點可能冇親熱戲,做得演員就預咗,想拍咪拍囉!最好拍紅咗,到時我打跛腳唔使憂,有老婆養。」
其實女兒出世後,帶到長春由岳母照顧,夫婦二人卻留在北京定居。奇怪的是,石洋子和啟華一起後,多年沒工作,過着少奶奶生活,但女兒卻要帶回長春老家,啟華解釋:「咁個女唔跟佢(石)跟外母,一起身就要見到我外母,見唔到就喊,我都算OK,返到去我湊佢都跟我。」本來他有想過安排女兒在北京上學,師資各樣都較好,再請工人照顧,外母最多留大半年幫手,但在長春有親戚大家庭,成長會好好多,考慮學校和家人兩方面,最後還是把女兒留在長春。

打程至美落地獄

情史一大籮的啟華,命中注定要圍住女人轉,妻女外還多了個外母,難得他開懷大笑說:「所有男人都係咁㗎啦!掛住個女,掛住太太。」
以為石洋子愛老公更多,所以甘願放下女兒,陪在他身邊,實情兩夫婦卻不是常待在一起,啟華說:「有時一個月都見唔到一次,我有個幾兩個月冇返到北京,上次都係留到幾日,佢喺邊度都好,我冇可能一定喺度,工作要周圍去。」
猶記得當年啟華在《妙手仁心》系列扮演程至美醫生,為他塑造出近乎完美的好男人形象,但03年在北京拖女夜遊,一夜間將程至美打落十八層地獄,及後和金巧巧一段情等等負面新聞,淹沒了啟華的一切,好形象頓變泡沫,所以聽得最多是師奶投訴說:「係男人都鍾意去滾㗎啦!」
事過境遷,吳啟華與石洋子婚後的確再沒有被發現夜遊媾女,但老公離開一頭半個月,胡思亂想總有吧!但石洋子仍堅持說:「一點也不擔心。」啟華亦不諱言晚上應酬依然繼續,他說:「夜晚好多應酬都會去。」就算啟華不再花弗,難免偶爾遇上一個半個操半鹹淡廣東話女人撲埋身說:「啟華,你好靚仔呀!」啟華得戚說:「女仔走埋嚟影合照,日日都有喎!有乜嘢辦法?大家講信任,要唔信,日日喺身邊都可以唔信,自尋煩惱冇用㗎!」

夫婦之間冇秘密

夫妻相處之道在乎信任,啟華覺得夫婦間不應存在秘密,所以他過往的歷史情史,太太都知道,啟華說:「一個女人嫁畀你之前,唔去睇吓你做過乜就嫁你咩!但我冇乜秘密。」

未央生一世不滅

要說吳啟華的演藝事業,不可不提他演過兩個深入民心的經典角色,除程至美醫生外,未央生也是焦點。91年啟華拍下三級片《玉蒲團之偷情寶鑑》,雖然電影寫下三級片的輝煌一頁,但對啟華來說,始終是不堪提的遺憾,問啟華會否嚴禁妻女觀看以保住好丈夫好爸爸形象?啟華嘆口氣說:「做過呢一世都會跟住你,太太點會唔知我拍過《玉蒲團》,當年佢得嗰幾歲,邊有得睇,佢想睇咪睇囉!唔會阻止,人有自由,就算個女第時過咗18歲,一樣可以睇,到時我都骨頭打鼓。」談起這個話題時,石洋子表示沒看過也沒打算看,不過,她一直斜眼望着老公陰陰嘴笑,似乎已把這事當作一則笑話。

轟無綫太孤寒

提起這部三級片,啟華仍然咬牙切齒,滔滔不絕地說:「嗰段時間真係唔想再拍戲,後悔到不得了,一時衝動接咗,即刻已經唔想拍,但如果唔拍俾人告我要賠二千萬,個角色我係做到,奸角我都可以演到好乞人憎,但要演一個好男人,要觀眾鍾意你好難,做到就唔想整花自己個底。」
所以現今投資有道不靠拍劇搵錢,為保形象自然會揀角色拍,啟華開出三不規條,不返無綫拍劇、不接奸角、不演古裝,啟華坦言:「TVB太孤寒,我好現實,出面市場咁大,好多機會搵到錢,角色同錢少一樣我都唔拍。」

靠人氣做生意

其實啟華將整個生活重心北移後,曾表示有意成立製作公司拍電視劇,計劃找老拍檔鄧特希寫劇本,一副雄心壯志模樣,但事隔一年,已轉口風,他嘆氣地說:「哎!搞個劇本都搞到我頭都大埋,唔搞啦!太煩。其實搞製作公司係賺唔到多錢,做呢行咁耐,想搞部好好睇戲出嚟,叫人寫劇本,錢就畀咗,又唔交功課。」
當製作公司老闆觸礁,轉移向房地產埋手,啟華說:「同其他朋友做投資房地產仲易搵錢,簡單易過拍戲,我本身唔識,朋友肯帶住,喺大陸做嘢靠關係,有好多人願意同我哋一齊玩,貪我哋係名人,易做成一單生意,有啲似公關咁。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載