› 選擇地區
三藩市
紐約
洛杉磯
其他美國地區
香港 台灣 北美
 
2011年10月15日

有話兒:老翻星爺溫超聲途璀璨

溫超早前應馬會邀請與李潔瑩客串做評述員,幸好溫超自小喜歡睇馬,所以講得似模似樣。
攝影:陳慧安 場地提供:沙田賽馬會

外表賞心悅目,當然較易在娛圈走紅,但原來靚樣不足,單靠把聲亦可打響名堂。憑着一把幾可亂真的周星馳聲線,溫超迅速成YouTube人氣王,由廣州殺落香港。不過成功需苦幹,自小已苦練扮聲絕技的他,原來除了扮星爺,還會模仿張國榮,他得戚地說:「都有人話我扮得似㗎!嗰時就有種滿足感覺。」
撰文:譚倩宜

一直於廣州電台報道交通消息的溫超,去年因參加「《喜劇之王2》星呢選秀大賽」而廣為人認識,面試片段上載至互聯網不久,即被網友冠以「史上最似周星馳的人」外號,更被視為比賽大熱,不過此時溫超卻遭打壓,被勒令退出比賽:「當時因為爸爸出事,加上我係偷偷參加比賽,唔係光明正大嘅,比賽出街後自然被發現,佢哋(指電台)畀壓力我,我要養家,喺份工同比賽之間選擇,我揀咗退選。」
雖然溫超無緣演出《喜2》,不過溫超自此「聲」途璀璨,不少廣告商找他發聲,亦有多齣電影找他演出及配音,就連馬會早前也邀請他與李潔瑩(Kit)客串當一天評述員:「講馬真係第一次,多得阿Kit同我惡補,佢教我睇馬形、戰績等等,幫咗我好多。」

親子活動睇馬

小時候溫超會跟爸爸於電視機旁一同欣賞賽馬,他笑言這是個不錯的親子活動:「小朋友都鍾意黐住爸爸,加上我爸爸要出外工作,得星期六、日先會返屋企,所以每逢賽馬日都會同佢一齊喺屋企睇賽馬,仲會大家一齊叫,成個過程好開心,呢個就係我哋嘅親子活動。」
自小就愛逗人歡笑,加上家人是星爺迷,故在小學時代溫超已鑽研扮星爺之道:「小學嘅時候覺得把聲有少少似,所以開始模仿星爺。其實好多男仔都鍾意扮佢,因為覺得好型又到人開心,我就係因為全家人都好鍾意星爺,所以成日都扮嚟大家開心。」其實除了扮周星馳,扮張國榮亦是溫超的拿手好戲,他說:「因為哥哥鍾意張國榮、張學友,所以細個都有扮過吓,都有人話我扮得似㗎!嗰時就有種滿足感覺。」
扮乜似乜,理應可以到不少女生,但他卻不曾用過這「捷徑」來追女仔:「又唔會用呢樣嘢嚟追女仔,遇到心儀嘅,我會靠自己,用真感情嚟打動佢。」

酒後胡言惹禍

雖然聲線語調似足周星馳,不過溫超卻未如星爺般自信,每次回答問題前,均要思前想後,問到他何以如此小心翼翼?溫超想了良久才說:「一個新人唔適宜太多口水、太高調,適當咁傾吓偈就可以。」曾因口多而惹禍?「做電台嗰陣,試過同啲幹部應酬飲酒,當時自己唔飲得但又要逞強,成50幾度嘅酒都杯杯清,結果就飲醉咗,仲講咗啲唔應該講嘅嘢。」語畢溫超尷尬地笑。
談到未來發展,溫超坦言有意向喜劇進發:「自己鍾意人開心,所以都會以喜劇呢個劇種發展。」早已看得通透的他,並不介意背着「翻版星爺」的外號,只擔心沒有機會:「正正因為呢把聲,幫我快速咁踏入娛樂圈,我唔會介意搵我配音嘅人都係要我扮星爺嘅語氣,作為一個演員,機會到就要好好把握,唔可以介意呢樣介意嗰樣,點去用聲演一個角色亦係種訓練。」視萬梓良及吳君如為偶像的他,最希望是有天可跟兩位前輩合作拍喜劇娛樂觀眾。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載