› 選擇地區
三藩市
紐約
洛杉磯
其他美國地區
香港 台灣 北美
 
2011年12月29日

馮仁昭四圍超:陳山聰民初偷情
雙黃線贈興 - 馮仁昭

無綫劇橋段十年如一日,但穿崩鏡頭就鑊鑊新鮮,近期仲穿崩穿得好密,馮仁昭開始懷疑無綫係咪特登,等啲觀眾可以捉下錯處冇咁悶。
無綫民初劇《我的如意狼君》星期一晚嗰集,講陳山聰喺樓梯推跌演佢老婆嘅葉翠翠,佢就同劉俐(藍莓)演嘅情婦坐人力車出街,點知條路竟然出現咗全日唔畀停車嘅雙黃線,旁邊仲有啲現代鐵欄杆,雖然鏡頭得一秒,但眼利嘅網民一眼就認到。
早兩日《我》劇已經俾人發現咗姚子羚飲緊支有BarCode嘅紅酒,點知隔兩日佢哋又穿越時空去咗香港某條街坐人力車,不過都未夠之前《萬凰之王》喺皇宮出現樽裝烏龍茶咁離奇。

天華玩死Niki

另外,《我》劇女主角周麗淇(Niki)噚日去咗商台接受訪問,有消息話舊愛鄭嘉穎想同佢翻撻,但俾佘詩曼阻止,Niki話:「可唔可以唔答,點答都死,翻撻呢個字即係話有一齊過,咁敏感嘅問題我真係唔答。」問佢喺梁靖琪婚禮度係咪俾阿佘怒睥?佢話:「我真係唔知點解咁多呢啲新聞。」
Niki話自己單身,所以專心工作,但同場嘅謝天華就加多腳問佢:「你拍拖拍成點,都係同嗰個㗎啦?」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載