› 選擇地區
三藩市
紐約
洛杉磯
其他美國地區
香港 台灣 北美
 
2012年04月05日

Isabel腿張開得米

陳逸寧在《春嬌與志明》中爆粗相當出位,成功搶鏡,令人留下印象。
攝影:陳志嵐
場地提供:OysterStation

【春嬌與志明的故事】一句粗口「嗰條臭X叫你春嬌姐」加一句啜核對白「腿張開」,足以令一個十幾年前就入行,電視電影廣告作品數十,但做極都冇人識,兼沒辦法說得出她名字的小配角成功翻身,陳逸寧就是電影《春嬌與志明》中的「腿張開小姐」Isabel,終於吐氣揚眉。 撰文:魯萍

電影《春嬌與志明》導演彭浩翔將低俗對白變成笑話,更可能成為潮語,將小配角變得耀眼,陳逸寧演春嬌(楊千嬅飾)同事兼死黨Isabel,雖則沒像Brenda般受無數平庸中女所景仰,但看過電影的觀眾,無不因她說的兩句對白「腿張開」及「嗰條臭X叫你春嬌姐」而爆笑。
Isabel跟春嬌同被調職到北京,春嬌前度男友張志明(余文樂飾)拖住露出幾吋事業線的新歡(楊冪飾)現身,年紀、身材都佔優的新歡叫了一聲春嬌姐,Isabel因死黨受辱憤而爆粗「嗰條臭X叫你春嬌姐」,僅兩秒對白,卻花了很大力氣。

98年入行終出頭

Isabel說:「粗口一定講過,好嬲要鬧人通常都係講仆街,但唔會用到臭X,尤其呢句鬧番女人,導演叫我講呢句對白,真係講唔出,我問用八婆代替得唔得,咁當然係唔得啦!叫我試講一次畀佢聽,唔似,佢要我周圍同人講做練習,我同余文樂講,佢話聽得好唔順耳,跟住我就對住燈光、梳頭每個工作人員都講一次,差唔多試咗二、三十次,最後埋位拍,NG幾次就成功,由女人把口講出嚟確係好爆。」Isabel還指電影出街後,導演興奮對她說:「都話嗰句得㗎啦!講乜八婆吖!」
以為艱巨任務完成,但又來一項新的。另一幕,內地演員徐崢演的Sam討好春嬌,春嬌言謝之際,Isabel在旁插嘴:「腿張開」,原來這句更難:「呢三個字搞到我NG好多次,唔係講得太細聲就係個位唔啱,個時間要夾到好準,徐崢一飄過我就要講,慢一秒都唔得,結果好成功呀!家所有朋友都叫我腿張開小姐,仲讚我做得好正,好感激導演同編劇,一句經典對白出自我口喎!」
現任職保險經紀的Isabel,當初想過不接拍《春嬌》,她承認一定後悔死:「因為我覺得終於都吐氣揚眉。」英文名跟角色名一樣的Isabel98年入行,演過《Y2K前的暑假》第二輯,同劇還有余文樂、方力申,之後簽約中國星,拍過彭浩翔執導的《破事兒》,又拍過優の良品廣告有咬唇女的稱號,但記得她的人沒幾個,07年轉職做保險,試過開舖賣衫,間中客串幕前。
Isabel說:「做保險好忙,不過導演話今集個劇本好正,第一集真係拍得好開心,好彩有拍,有意外收穫,咁多人鍾意。」雖然角色多人讚,但Isabel決定以保險為終身職業,間中客串拍戲:「拍戲太被動,但係我興趣。」

想效法Brenda徵婚

由林兆霞演的Brenda跟黃曉明的一段情、余文樂扮王馨平拍《別問我是誰》MV,還有Isabel的粗口對白,都成為電影的爆點,不過Isabel反而更愛楊千嬅和余文樂所演的一段情:「自己都喊咗四、五次,我好鍾意春嬌呢個角色,有某啲情節好有同感。」不久前她和男友分手,目前未有新戀情,Isabel竟然有想過效法Brenda戲中般徵婚:「我好欣賞Brenda鍥而不捨精神,我同Brenda拍戲friend咗,間中都會講心事,我信總有一日佢會遇到佢嘅曉明。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載