蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年04月14日
馬上成為壹會員

馮仁昭四圍超:娥姐寸阿滕、沈卓盈搞是非 - 馮仁昭

林夏薇噚日拍攝一場嫁畀袁偉豪嘅戲,着上婚紗嘅佢寧舍省鏡。

商天娥、滕麗名、張兆輝同沈卓盈等,噚日到九龍灣為無綫處境劇《結.分@謊情式》拍煞科戲,講述林夏薇同袁偉豪結婚大團圓。娥姐拍呢套劇時先同張兆輝傳不和,之後又傳滕麗名同沈卓盈聯成「插娥雙嬌」,又話滕麗名其實同娥姐結怨多年,現場兩個真係零交流,娥姐仲語帶雙關話唔會再大聲講嘢免得俾人誤會佢鬧人。當記者要求娥姐同滕麗名及沈卓盈合照,阿滕一個閃身走落台,沈卓盈同娥姐亦隔住幾個人合照。

「點解搞咁多小動作」

之後嘅訪問中更加充滿火藥味,娥姐話:「我係個專業演員,做好份內工作,一切是非唔講,我唔需要用呢啲嚟維繫工作。我一向低調,唔會做小動作嘅人,人哋靠乜我唔理。」娥姐話自己直腸直肚,佢話:「我用個心去對人,唔係用身去對人。」會唔會避免同滕麗名及沈卓盈合作?娥姐直言:「盡量避免,唔想太多是非,好多同劇嘅同事話,唔明點解做嘢要搞咁多小動作。」對於劇集急停,娥姐否認受不和傳聞影響:「如果我咁有影響力,做高層唔做演員啦。」
滕麗明同沈卓盈一齊做訪問,阿滕表現好不滿:「箭頭唔好放喺真係做嘢嘅人身上,我同個個都係朋友係同事。」有指演員聚會,滕麗名與娥姐處於「有你冇我」嘅情況,阿滕話:「會唔會唔啱時間咋?我唔知,我又聾又盲又啞。」另外,有指沈卓盈拍劇時只係自己對咗稿就走,好冇禮貌,佢反駁:「唔回應咁多,呢啲新聞當宣傳。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載