› 選擇地區
三藩市
紐約
洛杉磯
其他美國地區
香港 台灣 北美
 
2012年05月24日

馮仁昭四圍超:鎮宇孖法拉7月上雲霄 - 馮仁昭

吳鎮宇當年嘅型仔機師look迷倒唔少女觀眾。《衝上雲霄》劇照

十年前吳鎮宇、馬德鐘、陳慧珊同胡杏兒主演嘅《衝上雲霄》掀起型仔飛機師熱潮,舊年無綫諗住今年5月拍40集嘅《衝上雲霄2》,但因為要就吳鎮宇個期而押後,聽聞家定咗7月中拍,有吳鎮宇、張智霖、胡杏兒同陳法拉雙生雙旦,首輯嘅馬德鐘同陳慧珊就被飛。

飛勻英法台

講到要就鎮宇而遲拍,無綫高層梁家樹冇否認,只係話有好多原因,總之家7月中拍,仲會去英國、法國同台灣拍外景,果然不計成本。之前話王維基嘅免費電視台都會拍類似嘅劇,梁家樹話有競爭係好,但無綫唔會理人,只會做好本份。
《衝2》新加入法拉做女主角,可謂加強陣容,因為近排法拉個勢好勁,佢喺內地個華鼎獎新銳百強排名榜排13位,榜首係楊冪,法拉係排名最高嘅香港藝人,對於有咁嘅成績,法拉喺電話度話受寵若驚,佢話都想多啲拍內地製作,不過最重要係試多啲有挑戰性嘅角色。至於加入《衝2》呢個重頭劇,法拉話好期待同鎮宇、張智霖喺電視上合作,佢之前同鎮宇合作過電影,好欣賞佢嘅演技,希望今次合作可以取經,法拉仲話希望有機會試演女機師,因為夠型喎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載