› 選擇地區
三藩市
紐約
洛杉磯
其他美國地區
香港 台灣 北美
 
2012年05月27日

有話兒:陳豪內斂秋官認輸

陳豪與鄭少秋(右)好演技已是事實,估不到連拍照時的眼神都有戲。
攝影:林德雄

因為《天與地》的關係,重燃觀眾追劇的心情;監製戚其義與編審周旭明再度聯手打造新劇《心戰》,繼續以破格手法探討人性。一頭銀白色長髮造型的鄭少秋,坦言今次角色最複雜,他對劇中對手、演變態殺手的陳豪讚不絕口:「佢用內斂嘅情緒去演好激嘅嘢,真係揀啱方向,我家都唔可以同佢比!」
撰文:何慧斯

在無綫劇集《心戰》中,飾演戲劇大師的鄭少秋,以演技推斷兇案細節協助警方破案,陳豪(Mo)則飾演魔術師兼變態連環殺手,隨着兩人的接觸越多,秋官發現陳豪背後隱藏很多秘密,更相信與連環殺手有關,繼而掀起一場正邪角力。
《心戰》播映只有一星期,坊間已經有很大的迴響,網民在討論區內紛紛透露劇情,議論紛紛,戲內戲外都稱得是戲劇大師的秋官,對於陳豪今次的破格演出讚不絕口:「阿Mo呢次嘅角色喺電視上未做過,拍宣傳片啲同事,睇完片段都話阿Mo今次會畀觀眾新刺激,佢係一個好鍾意做戲嘅人,我感覺到佢希望每一次演出都有新嘢,呢次做法係考驗自己,佢專登收斂啲去做好激嘅嘢,今次佢揀啱咗方向,呢啲咪係好演員,真係任怨任勞,我家都唔可以同佢比。」

角色複雜

秋官又說:「實在呢套戲係等於破案,雖然我哋講到好懸疑,好玄妙,用演技去破案,但係我哋好清楚話你知係點樣做,我哋啲線好明確,等於研究一個人嘅思想行為。呢類新聞每日打開報紙都會睇到,假如你用理性分析件事,你會覺得無理由會發生,如果將啲新聞拍出嚟,又會俾人話戇居,點會咁呀?家阿戚啲嘢,你可以話佢戇居,但係佢就要咁樣,人同生活就係要咁樣,人性就係咁,呢樣係阿戚嘅熱誠。」
過往演慣大俠的秋官,今次亦有別過往,一頭銀白色的長髮造型,不單要代入疑兇角色查案,短時間融入不同角色,演出多場戲中戲,難怪秋官坦言今次角色最複雜,他說:「旭明嘅劇本寫得好緊湊,我收到劇本嗰陣,我同旭明講,如果我有乜唔明,會隨時打畀你。初期都有問,不過埋咗位之後已經冇時間問。」

放下執着

問秋官過往有否試過出現類似情況,他坦言:「真係好少,但曾經有個階段好緊張自己嘅戲,嗰陣係電視劇高峰期,我嗰時個勢好似樣樣都得,所以會好緊張想保護呢個成績,即係點解話阿姐(汪明荃)咁緊張四圍管啲監製,佢只係想保護自己嘅成就,我曾經都有段時間係咁,後來先諗通,呢個只係我理想諗法,事實上要各師各法,擺埋一齊先有新嘢出嚟,唔可能個個都係鄭少秋嘅諗法,如果個個啲戲都係咁,有乜癮呀?你要放番畀人做。」
問秋官今次是否要出盡全力上陣?他笑說:「我次次都係盡力做好每個角色,有時咪以為平淡簡單嘅角色易做,事實上越平淡、越簡單就越難掌握,反而越激烈、越澎拜嘅戲會容易捉到重點。」作為一個演員,能夠成功演活一個角色,得到觀眾認同,當然開心,不過在過程中忘我地投入角色,又是另一層次的享受,秋官說:「到咗呢個階段,感覺真係好high,做演員情緒好豐富,觸覺亦好敏銳。我以前講過演員只可以用感性唔可以用理性,雖然唔可以一概而論,當有嘢要分析咪用理性去支持,但演嗰陣只可以用感性。」

陳豪原創

至於不少觀眾覺得故事情節與某些電影相同,血腥殺人的場面層出不窮,陳豪認為:「電視嘅尺度係非常有限,我哋只係透過畫面、氣氛令觀眾感受嗰種氣氛,我哋嘅戲反而係較着重內心世界,我殺人動機只係掩飾過去。我知大家話套劇似《沉默的羔羊》,但係我好注重原創,我唔要有任何人哋嘅影子,我要由零開始去創造,透過我嘅創意同過濾表達出嚟,我唔會諗好唔好,最少係我原汁原味創造出嚟。」
至於劇集的收視,雖然有人覺得現階段的收視未有定案,但他們異口同聲地說:「或者家趨勢係戲好未必等同收視好,我哋唔係放棄,一套劇嘅成功,唔係一個人嘅力量,好多方面配合,我哋有信心亦都有期望。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載