蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年06月09日
馬上成為壹會員

有話兒:心戰五魔惡業毀陳豪

《心戰》中的酒吧五人組,各代表着陳豪的心魔,黃德斌、簡慕華等五位演員演到着晒火,連拍照的眼神都好有戲。 攝影:林德雄

「每個人心裏面,都有不能讓人觸碰的地方,我們稱之為秘密。在自我保護的意識下,秘密會被壓抑、扭曲、遺忘;但當這種意識崩潰的時候,人的情緒會被牽動,妒忌、執着、暴力,潛藏的兇惡將會一發不可收拾。」因為這個埋藏在內心的秘密,令劇集《心戰》中的陳豪,分裂了邪惡、慾望、陰險、暴力及良心等心魔,推他走上不歸的成魔之路。 撰文:何慧斯

以探討人性為主題的《心戰》,播出至今話題佔據各大討論區,劇中陳豪(Mo)表面是一個快樂的魔術師,愛護家人和女友,可惜快樂背後,他為了掩飾過去的殺人經歷,影響心智而成為變態殺人魔,其後更分裂出邪惡、慾望、陰險、暴力及良心等心魔,最後在心魔的教唆下,逼使陳豪成魔走入絕路。

觀眾多想像空間

今次戚其義和周旭明找來黃德斌、簡慕華、李霖恩、何啟南及戴耀明飾演心魔,他們經常在Jekyll酒吧內相聚,以懸疑氣氛及造型配合下,將人性的弱點盡現眼前,的確掀起連場的高潮。
雖然劇集看似一般的警匪故事,但其實題材屬非一般的警匪片,難怪令部份觀眾摸不着頭腦,「邪惡」黃德斌說:「我哋希望增加觀眾趣味性,如果唔係唔使用呢個手法去拍攝,以前主角啲內心會用心聲表達出嚟,今次安排我哋幾個人演繹陳豪不同的內心世界,手法同以前好唔同,意識上令觀眾多咗想像空間,睇得投入咪有呢種錯覺。」
五人代表陳豪某一部份,所以演繹上要接近陳豪的神髓,但又不能完全照抄,有時會發覺他們與陳豪說話語氣很近似。黃德斌說:「我哋同陳豪嘅對話似一面鏡,呢個係好玩嘅地方,鏡頭前一次過做晒所有戲,我哋點樣演變成阿Mo,佢又點樣演變做我哋,喺每場戲埋位前,我哋都會對稿、研究燈光配合、走位,要排晒一次先開機,有難度亦係一種刺激。」

簡慕華殺出血路

「慾望」簡慕華在戲內風情萬種,更有不少意識大膽的床戲,簡慕華表示接到劇本後,從未為演出猶豫:「因為信得過導演,所以成個人畀晒佢,同埋電視尺度有限,我唔使暴露,只係靠感覺都可以拍到出嚟,我希望殺出一條血路,畀人哋睇到一個新嘅簡慕華出現,希望佢哋唔會反感。」
過往大多主持兒童節目的李霖恩,今次在戲內飾演「陰險」,劇集播映後受到不少網民大讚,更視為他的代表作,李霖恩笑說:「今次係第一次同呢個班底合作,成個拍攝手法好特別,再加上有一班夾埋超過一百年演戲經驗嘅對手,我仲因為呢套戲先咁鍾意演戲。」不過拍攝期間因為太過投入黑暗,連太太見到也有點驚,幸好李霖恩靠聽音樂飲酒去調節心情。
混身肌肉的「暴力」何啟南,雖然拍到失聲及弄傷腰骨,不過他說:「為咗拍晒肌肉場面,一有時間就去操大隻,結果熱身不足整傷腰,有十幾日要瞓床,到家仲要做針灸同物理治療,我未試過有一套戲,每一分鐘都要扯行晒,其實幾辛苦,所以cut機後真係謝晒。我試過喺房好用力講啲殺呀、殺你全家啲對白,搞到老竇走嚟問我乜事,整親條腰嗰日返屋企仲恐怖,的士大佬落車扶我,我入到屋企門口即刻趴低爬入房,仲好開心話舒服晒,真係嚇死我阿媽,好彩啲對白係要人聽唔清楚,所以我聲沙沙可以繼續演出。」

戴耀明良心復活

戲中陳豪的「良心」戴耀明,雖然出場不久便被黃德斌殺死,令陳豪因此失控,不過瘋癲過後,戴耀明會復活並阻撓陳豪犯事,戴耀明說:「係去感動番陳豪,但好人難做,只能夠喺佢背後囉囉唆唆,勸佢唔好去做壞事。」
對於陳豪最終成魔,五魔均異口同聲說:「酒吧所有嘢係代表陳豪嘅內心,阿Mo小時候嘅遭遇,令佢有一種負擔,最初其他人睇唔到我哋,到最後分裂到連酒吧以外我哋都會出現,而秋官都有呢個問題,所以我哋會喺佢面前出現。」
黃德斌還說:「陳豪係一個精神病患者,佢自己同自己分析,自己同自己講嘢,乜嘢都唔理,有啲人唔係天生想去攞刀殺人,只不過係佢錯亂到唔知自己做緊乜,所以應該多啲關心身邊人;如果遇到諗唔通嘅事,應該同身邊人傾,唔好自己諗,否則悲劇只會係越踩越深。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載