蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年06月09日
馬上成為壹會員

我主場:黃貫中三喜一憂

黃貫中着手籌備下月在紅館舉行的演唱會,卻擔心忠心粉絲朱茵會陀B在台前亂舞。 攝影:陳志嵐

在沒有預先「被諮詢」的情況,突然有一日知道三個月後要在紅館開騷;在沒有計劃的情況下,突然有一日「被通知」要當爸爸。雖然現時處於一個極忙碌的狀態,但黃貫中(Paul)沒有半點怨言,因為這兩件事都是他喜歡且令他快樂的事。完成演唱會便要着手處理人生大事,結束與朱茵的14年愛情長跑,緊接下來就是迎接BB出世。在歡天喜地之際,阿Paul檢查發現聽力受損,右耳餘七成聽力,但他選擇樂觀面對,繼續玩搖滾。 撰文:李珮洳

早前黃貫中與朱茵在網上宣佈喜訊,二人即將榮升父母,原來阿Paul在知道這個喜訊前,先接到另一個喜訊,就是下月13及14日在紅館舉行兩場「Rockestra」演唱會。阿Paul表示今次開騷,經理人完全沒有向他提過半句:「經理人有一日喺內地返香港,之後就走去紅館入紙,當時佢仲唔夠錢畀差唔多十萬訂金,正當佢好惆悵嗰陣,喺手袋搵到四千幾蚊人仔湊夠數,之後就批咗個期。」
當阿Paul得知此事時,反應是:「仆街啦,好嘢!」有得開騷固然感到興奮,不過當時已經是4月,阿Paul心中第一個問題就是沒太多時間準備,接着經理人逼他交歌,之後就是一連串開不完的會議,那時候的他仍未知朱茵懷孕。

籌備個唱攰爆

不久另一個驚喜出現,阿Paul要當爸爸,他便開始好好分配時間,因為這個「大project」絕對不容忽視:「好彩阿茵都係做呢行,好通情達理,知道我要開騷好忙,自己好乖喺屋企休息,我出去做嘢佢從來都唔會問我幾時返。」阿Paul指經過密集式的會議後返回家中,腦海中仍然思考演唱會的問題,阿茵就會向他說:「喂,我想食嘢呀!同埋你過嚟睇吓張BB床。」女友一聲,他要即時回過神來,阿Paul說:「嗰下雖然好攰,但係屋企嘅事真係冇得假手於人,同埋心情係好開心,我都盡量想陪佢出街買吓BB用品,同埋要籌備婚禮。」
問到求婚的問題,阿Paul本來細細的雙眼即時連成一線,見他面上的笑容,令身邊的人都感受到他的甜蜜,阿Paul強調在朱茵有BB前已求婚成功:「石頭我都送咗好多次㗎啦,同埋好耐之前求咗婚,絕對唔係因為有BB先求婚,咁樣太冇誠意啦。至於個婚禮點搞,一切都係阿茵話事,佢想點就點,最緊要佢開心。」

在家全面禁煙

講到朱茵,阿Paul彷彿變了另一個人,比起講音樂、談社會政治時溫柔得多。不久就會榮升爸爸的阿Paul,心態上暫時沒有太大改變,他透露最大的改變就是吸煙習慣,他一邊做出食煙的甫士一邊說:「我會去廚房同廁所食,開住抽氣扇都怕啲煙吹到出去,有時就伸咗個頭出窗噴啲煙出去,如果喺廁所就要企上廁所趷高腳,食食吓覺得食得咁鬼辛苦,索性喺屋企唔食。」
每次阿Paul開騷朱茵總是走到台前又唱又跳,最忠心的歌迷非她莫屬。現時腹大便便的她,早就嚷着下月一定要去紅館支持。阿Paul這一刻已經十分擔心:「我叫佢唔好去,佢就同我講話BB要去聽歌,咁我仲可以講乜啫。我同佢講去後台睇,佢又話BB要睇,到時會搵專人睇實佢,真係好驚佢仲喺台下跳舞呀,到時叫我點專心演出呀。」問他會否寫一首歌給朱茵及BB?阿Paul反問說:「我唔會做呢啲嘢,同埋點解只係一首歌,咁唔通其他歌就唔係送畀佢哋?應該成個演唱會都係送畀佢嘅。」聽完這番話,明白鐵漢總會有柔情的一面,14年的感情就是靠這份甜蜜來維繫。

誓要保護妻兒

當日阿Paul與朱茵於網上宣佈喜訊,二人結伴返港接受訪問,隨之而來就是被問到教徒未婚懷孕,當時阿Paul憤怒了,他說:「我當時係要保護阿茵,我唔想佢唔開心,作為佢身邊嘅男人我要保護佢。」假若日後再有人問同樣問題,阿Paul指不會再回應:「首先我想講我唔係教徒,如果大家要去問阿茵,佢只會笑住唔答,大家係唔會得到答案。我明白大家都係因為做嘢要問呢條問題,如果係要問嘅就叫佢哋老總嚟問我,點解要啲女仔問埋呢啲問題。」
講到Beyond復合,早幾個月達明一派開騷後,facebook即有Beyond粉絲開群組要求他們復合再開騷。阿Paul聞言沒有半點驚訝說:「基本上我年年都聽到呢個要求,我今次會唱Beyond嘅歌,如果大家入嚟想睇Beyond演唱會嘅話,咁你唔好買飛啦!我係Beyond嘅三份之一,就算我話OK,都係三份一OK,我真係答唔到大家聽日嘅事。」
髮型:MatthewKong(Headquarter)
化妝:JohnathanLi(ModMakeupAcademy)
服裝提供:G-StarRAW

聽力受損堅持搖滾

早前阿Paul於微博上透露自己的聽力受損,之後又上載到醫務所檢查聽力的照片,令歌迷們擔心不已,他已解釋並不是完全失去聽力,只是聽力開始受損。阿Paul表示醫生叫他不要再玩搖滾音樂,或者玩音樂時「細聲啲」,甚至提議他轉玩其他較溫和的音樂,阿Paul強調寧願聾都不會放棄搖滾。現時阿Paul的右耳聽力比左耳弱,他說:「我右邊應該係冇咗三成聽力啦,左耳暫時都OK,其實我玩咗咁多年搖滾音樂,到家先有少少問題都好正常,同埋暫時都係某啲頻率聽唔到。」

側身似謝賢

阿Paul笑言將來不排除自己會變了謝賢,他笑說:「因為我家右邊聽得差啲,咁我又唔想淨係靠晒隻左耳去聽嘢,於是我開始成日側埋右邊聽人講嘢,可能將來越聾個身就會越側,終有一日側到好似謝賢咁行。」
作為一個音樂人,面對聽力受損的問題理應十分煩惱,幸好阿Paul一向是個思想正面樂觀的人,他說:「Fans真係唔使太過擔心,我已經諗好啦,我估距離完全聾晒嘅日子應該仲有廿年,呢一日嚟到,我就可以做一直想做嘅事,就係畫畫啦。我相信喺一個寧靜嘅世界入邊,可以畫得出好好嘅作品,因為到時冇任何煩擾嘅聲音可以騷擾到我,同埋我估我嘅畫都應該好值錢呀!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載