蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年06月20日

港姐互篤越揭越臭
湯洛雯蝦蝦霸霸 翻版妍希爛賭

【倫敦直擊】香港小姐向來標榜美貌與智慧並重,今屆佳麗冇樣冇身材,被王晶狠批應全部淘汰,估不到無綫以生還者形式淘汰佳麗,更令她們互爆醜行,連智慧、品德都冇埋!其中兩大熱門湯鎮業姪女湯洛雯及翻版妍希陳潔玲都被篤爆醜行,湯洛雯被投訴蝦蝦霸霸欺負李渼琦,陳潔玲則被網友踢爆嗜賭,今次就連港姐品格都淪陷了。

相關新聞:張名雅粉絲掀罵戰

無綫《2012香港小姐競選》14位候選佳麗,於香港時間前日在倫敦名勝GrosvenorSquare繼續拍外景,由於之前落敗的A組佳麗陳華鑫和鍾麗已被out,大會將B組的20歲混血佳麗李渼琦調往A組,與20歲的尤蔭蔭及卞曉帆同組,但估不到李渼琦調組後,即忍不住狂插B組隊長湯洛雯,直指遭她欺負。

「掉濕毛巾落我個袋」

早前有指湯洛雯在倫敦入住酒店期間,內衣褲四圍亂放,她前日否認說:「真係冇,內衣係公司安排,用完入落袋度還番畀公司。」湯洛雯坦言入圍後是非不斷而不開心,但現已習慣了。
而貌似人生教練Winnie的佳麗尤蔭蔭,亦被指為選港姐缺席大學畢業禮,她嘴藐藐說:「去唔到都冇法子,兩樣揀我梗係揀港姐。」至於被指貌醜,尤蔭蔭反駁:「人哋咁覺得都冇法子,如果我醜又點可以嚟到呢個地步?港姐係美貌智慧並重,同埋港姐係有道德,日久見人心,遲啲大家知邊個有道德。」
尤蔭蔭擺明言之有物,被追問下她繼續爆料說:「俾人蝦嗰個唔係我,我個樣咁惡,蝦都蝦純嗰個。」在旁的李渼琦被追問是否被同房的湯洛雯欺負,她直言:「係呀,第一日幫佢執衫,但佢又掉濕毛巾喺我個袋度,佢有好多嘢,搞到我冇位,佢霸晒啲位,我好唔開心。」

李渼琦:驚佢整蠱我

李渼琦謂已向無綫投訴,並指湯洛雯曾在房內哭泣,李渼琦說:「我有少少驚佢,驚佢整蠱我,我見佢朝早有喊,但冇同佢講嘢。」李渼琦踢爆湯洛雯的惡行時,其他佳麗在旁支持。對於李渼琦的指控,湯洛雯說:「佢真係咁講?佢好早瞓,為咗唔嘈醒佢,我索性唔冲凉,好多嘢我都同佢share用,我真係冇蝦佢,唔明點解佢咁講我。」雖然李渼琦被蝦,但她昨獲選為第三位直入決賽佳麗,總算有點安慰。
除了湯洛雯人前人後兩個樣,同樣是非纏身的翻版妍希陳潔玲亦愛扮friend,有人見她在旁聽到李渼琦說在B隊不開心時,她對林泳淘說:「唔開心咪走囉!」但活動結束後,她卻熱情地去擁抱李渼琦。
眾佳麗昨到白金漢宮拍攝,李渼琦被問到前晚返房後有否跟湯洛雯傾偈?她說:「佢冇同我講嘢,我唔想同佢有任何嘢。」湯洛雯昨日眼腫腫,問她是否喊過?她說:「喊咗少少,不過平復咗,冇諗過佢咁話我。」問她返房後有否跟李渼琦傾偈,她說:「佢調咗房,大家平時有講有笑,唔明點解佢咁多不滿。」昨日李渼琦和尤蔭蔭表現避忌,疑無綫施壓叫二人收口。

化名ling分享賭波經

另外,陳潔玲被指與已婚導演彭發關係曖昧,加上她的時裝店涉賣假貨,甚至被指整容,原來她更是賭精一名,昨有爆料指她與彭發拍拖兩年,常齊過大海賭錢。有指她在香港討論區的賬戶叫「ling_101111」,常開帖分享賭波心得,連冷門到日本職業聯賽都賭,其賭波心得深受網民認同,有網民戲稱她做「ling哥」,而該賬戶曾回帖:「同我條仔一樣wor,除咗賭,冇其他興趣,賭波賭馬,過大海玩兩手,可以咁講,我同男友做人最大的樂趣都是賭。」兩年前陳潔玲曾在多個私影論壇留下個人相片和資料招募攝影師,其電郵賬號正是「ling_101111」。 
採訪:王崇穎
攝影:黃偉雄

若讀者知道這班入圍佳麗的底細,歡迎電郵至mailto:adent@appledaily.com報料。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載