蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年06月23日

有話兒:羅泳嫻心戰三日死出頭

羅泳嫻慶幸今次不用靠緋聞上位,而是憑自己的表現去贏得觀眾讚賞。 攝影:陳俊強

已為人妻的羅泳嫻最令人記憶深刻的絕對是02年與吳啟華的一段情,當年令她略添名氣,雖然兩人最後分手收場,但事隔10年,她終憑無綫劇《心戰》中卧底一角,令網民大讚,她也開心不已,因為終於不用靠緋聞上位。 撰文:王崇穎

入行多年的羅泳嫻給人的印象只是吳啟華的前女友,為人熟悉的作品寥寥可數,但在近日無綫劇《心戰》中,她飾演的卧底女警假扮妓女,雖然她並非主角,連重要人物也稱不上,但這三集戲份已令觀眾難忘,不少網友大讚她演得出色。

模仿港女說話

羅泳嫻01年入行後拍過不少劇集,但大多數是行行企企的路人甲,這次同樣的角色位置,卻令她開心不已,她說:「觀眾出嚟嘅回響都令我好意外,雖然只得三集,仲要死咗,但其實拍呢三集我都好辛苦,因為當時係冬天,其中一場仲要着吊帶背心,真係凍到我死。」
羅泳嫻也很感激網民對她的讚賞,她說:「真係好多謝佢哋,出到街都有人讚,同問我係咪拍《心戰》嗰個女仔,所以好開心,仲試過有人話留意我拍劇好耐,聽到嗰刻覺得拍劇幾辛苦都係值得。我始終喺TVB真係由低做起,乜嘢閒人都做過,好多時冇對白都試過,所以今次好感動,當然拍嗰時唔知會有咁嘅反應,最令我開心嘅係原來個個觀眾都唔捨得我死。」
雖然絕非首次扮演妓女,羅泳嫻今次仍然做足功課,學過化妝的她除了在妝容方面下足工夫外,連時下港女的習慣也重新學習,羅泳嫻說:「都有研究時下女仔嘅心態點樣講嘢,就係有乜大不了,駁嘴駁舌,咁之後以卧底身份死,又係另一個層次,會穩重番少少,事前都不停喺屋企練習,特別喺駁嘴嗰部份,搞到嗰時照鏡都想摑自己,連我阿哥睇完都話想摑我,因為平時我唔敢咁樣。我喺日本讀書,所以會好注重禮貌,有乜事先認咗錯先。」對於該劇剛播出時被指血腥,她說:「本來無綫拍開AB餐,家多左CD餐去畀你揀都幾好,當然有人鍾意亦會有人唔鍾意,之前成日話TVB冇得揀,家咪有囉。」

日本學習化妝

羅泳嫻06年曾隻身飛往日本讀美容學校,令自己有一技之長,09年畢業即回港重返無綫,她表示在日本兩年增值不少,到現在也能學以致用,她說:「因為喺無綫真係由低做起,試過成日都冇工開,我喺香港讀書唔叻,但始終都要進修吓,就把心一橫飛去日本讀美容學校,咁自己真係對呢方面有興趣,有邊個女仔唔貪靚,唔想每日都扮得靚靚㗎。」

「吳啟華係過去式」

02年與吳啟華的一段情令羅泳嫻人氣提升,兩人只拍拖短短一年便分手,經過多年時間的洗禮,羅泳嫻眼前最希望可以憑自己己的實力洗底,她說:「唔想成日個名仲要同佢扯埋一齊,佢當時追我追得好厲害,但家對我嚟講已經係過去式,打從當時我都知道無論我工作上幾努力,都必定係同佢既名糾纏不清。」

嫁德籍老公

羅泳嫻續說:「其實當時都幾唔開心,因為好多人覺得我想借佢上位,我真係好唔開心,所以今次《心戰》呢個角色希望可以為我洗底。」訪問當日,現年31歲的羅泳嫻手上戴了一隻卡半鑽戒,皆因她已為人妻,今年4月已嫁給德籍男友,她說:「家婚後嘅生活都好穩定,同老公互相支持,家心態會比以前輕鬆,因為經濟支柱會喺老公身上,咁佢都係一個好保護屋企嘅男人。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載