› 選擇地區
三藩市
紐約
洛杉磯
其他美國地區
香港 台灣 北美
 
2012年07月11日

拖手濕平晒恩愛
杜汶澤、田蕊妮睇BB衫疑有喜

死過翻生的杜汶澤,養病休息後終全面復出,稍後會宣傳兩部電影的他,把握時間與太太田蕊妮在銅鑼灣拍拖晒恩愛,期間發現兩人到專賣BB衫的店舖,惹來懷孕疑雲,但亦有可能是送賀禮給老友劉德華的囡囡向蕙。阿田事後否認懷孕,她直言想置業多過生B。

曾經患上罕見病症的杜汶澤,養病後終全面復出,阿澤將要為電影《低俗喜劇》及《DIVA華麗之後》宣傳,加上太太田蕊妮正值休假,於是兩人爭取時間拍拖晒恩愛。前晚他們先到銅鑼灣的連卡佛睇女裝服飾,阿澤全程充當跟得丈夫,雖不時被其他顧客眼望望,但他們一於懶理,阿田揀衫時,阿澤則在旁玩電話,間中亦有將電話的內容告知阿田,場面溫馨。

換環保車

後來兩人到禮頓中心的FIATCaffè嘆咖啡兼睇汽車精品,小休一會後又到附近的服裝店睇衫,阿澤則不時與店員吹水,逗留十分鐘左右空手走人。阿田與阿澤又走入一間專賣BB衫的店舖organicwearforbabies,隨即惹來懷孕疑雲,但亦有可能送賀禮給老友劉德華的囡囡向蕙,可惜仍是空手而回。其後他們折返連卡佛掃化妝品,收穫甚豐的阿田與阿澤揸車離去,反樸歸真的阿澤更被發現換上環保混燃車。

呻樓價貴

阿田昨日出席無綫劇《衝呀!瘦薪兵團》在電視城舉行的祝捷會,問到阿田是否有生育計劃?她說:「有諗過,但係唔會生住,我哋呢一刻都好滿足現狀,如果生BB為咗開心,我諗家嘅開心都好足夠,如果想咪玩住人哋啲BB都得喇!」她又說:「呢幾年都冇呢個計劃,我哋反而想買樓,但係樓價好貴,所以交畀阿澤。」此外,楊明表示因未安排酒席,故9月會先到美國行禮,明年再在港擺酒。
採訪、攝影:梁繼光、朱志明、黃文成、黃曉妍

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載