› 選擇地區
三藩市
紐約
洛杉磯
其他美國地區
香港 台灣 北美
 
2012年07月13日

我得寵:胡杏兒1屋8貓 難產最痛

胡杏兒自小已開始養貓,更為高竇貓平反指牠們只是較有性格。

貓一向給人難以接近的高竇感覺,養貓的人甚至自嘲貓奴,貓奴胡杏兒養了八隻貓,她解釋貓咪其實並不高竇,只是較有性格和慢熱,愛貓也非常黐人。但談到與貓咪相處最難忘的時刻,杏兒傷感地勾起年前貓女波波難產的慘痛經歷。 撰文:文國駿

胡杏兒自小與貓有緣,八歲起開始養貓,至今共養過15隻,現家中仍有八隻「貓主人」,分別是貓爸爸包包、媽媽波波、女兒灰灰、兩個兒子豆豆及JoJo,黃黃、咪仔及虎虎則分別由杏兒及其大家姐和二家姐執回來養的。

偏愛霸道包包

問到杏兒起初為甚麼會養貓?她表示:「我記得好細個時爸爸就拎咗幾隻貓返屋企畀我哋幾姊妹養,我哋都養得好好㗎,佢哋都去到20歲先過身嘅,算係貓瑞!」她又坦言小時候覺得狗太熱情,經常會被舔得滿面口水,所以未有想過養狗。貓一向被指高竇,杏兒即為牠們澄清:「其實貓並唔係咁高竇,佢哋只係有性格同埋慢熱少少啫,好似包包咁,佢都好熱情成日黐住我㗎。」
對於家中的八位「主人」,杏兒坦言特別偏愛大大份又經常蝦蝦霸霸的包包,更指牠似足《多啦A夢》中的胖虎,她說:「包包係灰色嘅英國短毛貓,佢喺屋企成日好似大晒咁嘅,成日蝦其他貓,不過對人又好好,好溫柔,而且佢好有靈性,好似成日知道我想講乜嘢咁,我放工返屋企又會喺門口坐定定接我。」

幫手接生驚險

對於與一眾愛貓的開心時刻,杏兒笑言要數也數不清,簡簡單單如晚飯後坐梳化上,被八隻貓咪賴在一起已覺開心,但提到最難忘的事時,杏兒立時顯得落寞並謂:「嗰陣買咗包包,之後再買埋貓女波波做包包老婆,我一直希望佢哋可以有下一代。」杏兒透露起初包包及波波的交合一直也不順利,直到一天她發現波波的肚很脹,才發覺波波真的有喜,她坦言當時很開心,如自己做了奶奶一樣,可是悲劇亦因此而發生。
杏兒說:「波波懷孕嘅時候我仲忙緊拍《肥田囍事》,有一日返到去發現波波穿咗羊水,我幫佢接生,不過生極都生唔出,最後要去醫生度開刀,結果難產,有兩隻出世時已經冇咗反應,剩番豆豆、灰灰同JoJo,嗰陣我即刻諗,我成日希望佢哋有下一代係咪唔啱,所以之後我都冇再要求寵物生BB,幫佢哋絕晒育。」

工人專職湊貓

杏兒當正包包和波波生的三隻貓咪如孫仔孫女,談到湊孫的苦與樂時,杏兒可算不遺餘力,更把工餘時間也全給牠們,她說:「嗰陣拍《肥田》已經好辛苦,返到去因為佢哋又好似唔係好識食奶,所以我要做埋奶媽,去開奶同營養飲品畀佢哋!」
杏兒現在工作越來越忙,她更特別請了工人照顧八隻愛貓,希望給牠們一個最舒適的家,杏兒笑言:「工人都好錫貓,係寓工作於娛樂。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載