蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年07月16日

鄧一君娶妻生女荷包脹
香蕉仔驚變肥蕉

93年憑《記得…香蕉成熟時》一片成名的鄧一君,05年退出娛樂圈後轉戰保險業,短短幾年已擢升為高級分組經理,但原來他職位越做越高的同時,身形也越來越脹爆。前日鄧一君偕妻女到銅鑼灣開餐,驚見他身形不但脹了幾個碼,而且更肚腩凸凸,昔日「香蕉仔」如今已變成熟透「大蕉」,絕對是歲月「吹」人。

相關新聞:人物誌:少年得志 後勁不繼

所謂中年發福,就連童星出身的「香蕉仔」鄧一君也難逃歲月「吹」人命運。現年35歲的鄧一君,05年退出娛圈轉投宏利保險做經紀,入行至今已擢升為高級分組經理,加上06年結婚後又做埋老竇,有妻有女有事業的他幸福滿瀉,但同時體重也跟幸福指數一起急升。

囡囡可愛紮紮跳

前晚8時許,記者在銅鑼灣時代廣場赫然見到久違了的鄧一君,穿上橫間條polotee及短褲波鞋的他,挽住city'super膠袋,不但佬味十足,而且肚腩凸凸,身形明顯脹了幾個碼,跟昔日俊朗的香蕉仔完全兩個模樣,令人驚嘆香蕉仔已變成熟透的大蕉。
鄧一君到超市購物後,隨即搭扶手電梯往下層跟太太及四歲囡囡頌情(Kristen)會合,之後一家三口到千兩食壽司,由於周六晚食肆人頭湧湧,一君惟有與妻女在門口輪籌等候。等位期間,一君愛女Kristen不時跳跳紮,十分活潑可愛,而Kristen深得父親遺傳,眼大大一副美人胚子,大有條件跟隨父親做童星。未知是一君身形暴脹還是久沒有在螢光幕上露面的關係,現場未有途人認出他,而一君一家三口等了足足半粒鐘才能入座開餐。

相關新聞:娛樂資料庫:轉行保險闖新天

記者昨日致電一君,對於自己身形脹爆,一君哈哈笑說:「發咗福都好正常啫,我家族一向都係肥底,以前做幕前就話要成日keep住啫,但我都冇做呢行,所以咪冇keep囉!工作又忙咗、又少運動,再加上年紀又大咗,所以咪肥囉!」是否經常應酬食飯所致?一君說:「我又好少應酬,但同人傾嘢時成日飲凍奶茶凍檸茶囉,不過,我覺得肥啲仲好,畀人感覺穩重啲吖嘛。」

目標做區域經理

談到囡囡活潑又趣致,大有做童星條件,一君表示不會阻止囡囡入行,他說:「睇佢大個啲鍾唔鍾意啦,佢如果有興趣,我都會畀佢做,不過唔係家囉,家年紀太細啦。」轉行七年,一君越做越起勁,他說:「以前拍戲好多嘢自己控制唔到,好多嘢都係講際遇機緣,但家唔同,係睇你肯唔肯努力同主動。我家有六、七個同事幫手,將來目標係可以升到去區域經理啦。」
一君昔日圈中人緣甚佳,當年他轉投保險業,也獲不少好友力撐支持,如他首張藝人保單便是古天樂,盛傳當年古仔找一君買下巨額保險,連徐子淇等也是其好友顧客之一。
採訪、攝影:黃文成

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載