蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年07月16日

都是那些年
文佩玲重享娛圈虛榮

文佩玲前半生有如坐過山車般起跌,她笑言無悔當日的任何決定。攝影:陳慧安

許志安、黎明在現今樂壇各有位置,還記得他們都在第五屆新秀歌唱大賽敗給個子的骰的文佩玲(文文)嗎?贏得冠軍,原來不等於贏得一切,結果令文佩玲心灰意冷退出娛樂圈,發展反不及亞、季軍,但人各有志,她的成就,就是生了個乖女。撰文:羅美倫

文文參加86年第五屆新秀歌唱大賽,擊敗許志安、黎明,贏得冠軍兼最佳台風獎,滿以為自此娛樂事業一帆風順,豈料在華星只錄過一張唱片,最終還變了不見天日的倉底貨。89年轉簽EMI,曾推出《浪子Jacky》及《鬥氣》兩張唱片,但星運麻麻,結果在92年退出娛樂圈,不過她當年跟杜德偉合唱的《愛全為你》,及87年劇集《男兒本色》主題曲《錯在情多》,也令人留下深刻印象。

無悔急流勇退

現年48歲的文文,任職保險從業員,99年結婚,千禧年生下女兒Jasmine,不過當女兒兩歲多就跟老公離婚,依然是昔日短髮形象的文文說:「離婚9年一直冇拍拖,直至兩年前至拍過,後尾散咗,之前同老公離婚係因性格唔啱,因了解而分開,既然勉強一起唔開心,不如早啲決絕。」文文跟前夫關係OK,她與父母及女兒同住,在父母協助下專心工作及照顧女兒。
92年退出娛樂圈後,文文曾搞過時裝店、炒樓、打寫字樓工、水機直銷等,都是一些平凡人的工作,人生可謂有起有跌,那當年因心灰意冷而退出嗎?文文說:「有少少㗎,因為好多嘢唔係我可以控制,我幾鍾意話事,後尾至知冇話事能力,呢行講天時地利人和,唔係努力就一定紅,我做嘢好快抽身,唔適合即走,咁啱有男友照顧咪走囉。」由歌手轉做平凡人,文文坦言並無特別感覺,反而幾享受搭巴士、不用化妝的生活。

女兒最大成就

離開娛樂圈,文文連卡拉OK都沒唱過,直到前年她參加公司的聯誼晚會,老闆知她曾做歌手,安排她表演,結果當着8,000觀眾面前再唱歌,令她重拾唱歌樂趣,文文笑說:「一唱啲虛榮感就返番嚟,又諗番自己攞獎嗰一刻。」思緒飄回20多年前最風光時刻,但未有不甘心:「真係冇唔開心喎,真係好講時機,事實安仔係唱得好,黎生都唔錯,揀啲歌好聽,反而檢視番自己係做得唔足,好似揀歌自己唔識揣摩,當年走都係睇得通,唔可以勉強,決定咗就走,我都滿足現狀㗎,個女好乖,我人生最大成就係生咗個女。」

做了平凡人,文文也甚少留意娛樂圈的人與事,故對樂壇新人所知不多,文文說:「我唔睇娛樂版唔睇電視,除非紅啲,識陳奕迅因為佢真係唱得好,容祖兒就因為個女好鍾意,鄧紫棋把聲好靚,但唔知有乜歌,其他真係唔多識。」

最鍾意唱現場

在娛樂圈短短六年,文文的收穫也不少,除搵到錢外,亦識到好多朋友,偶然會跟林利、杜德偉、蘇永康等見面,最近亦因認識了黑妹李麗霞而再踏舞台公開演出,文文笑言:「家好多舊人返出嚟唱,多錢咪唱囉,唔係現實,live一定首選,錢係其次,而家心態唔係職業,但鍾意企喺舞台,唱歌係我最鍾意嘅,哈哈哈……家做藝人好難,冇乜私隱。」但現在無才藝也可做歌星,不是更易做嗎?文文再哈哈大笑:「冇意見,我自己都唔係唱得好好,不過我鍾意唱live,係鍛練,收得人錢唔可以唔做足功課,而家啲演唱會飛都唔平。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載