蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年07月30日

馮仁昭四圍超:
薰妮揭遭夫虐打離婚 - 馮仁昭

雖然薰妮嘅病情反覆,但佢依然參演舞台劇《麗花皇宮》。

憑歌曲《每當變幻時》成名嘅薰妮將演出舞台劇《麗花皇宮》,原來佢嘅人生就好似佢首飲歌嘅歌詞咁,一半樂事一半令人流淚,佢年前患咗紅斑狼瘡症痛不欲生,曾想過死,仲欠朋友成百萬,不過薰妮視呢啲挫折係考驗,仲會努力迎接,過咗一關又一關。
薰妮把磁性聲音唱《每當變幻時》唱到深入民心,都幾風光,但佢日前接受港台車淑梅訪問時,把聲就好沙啞,原來佢近年健康麻麻。薰妮話佢之前做割子宮手術,手術冇問題,但輸血輸咗個紅斑狼瘡症畀佢,抵得痛嘅佢都痛到忍唔住叫,所以曾經想過死,家病情都幾反覆,但佢相信好多嘢自有安排,個人仲變得樂觀。

欠債百萬

薰妮又透露多年前佢從事金融嘅老公因愛飲酒,曾醉後失控打咗佢四次,有次仲將佢成個拎起掟埋牆30幾次,最終離婚收場。不過薰妮話對前夫仲有感情,始終佢係一對仔女嘅爸爸。另外,薰妮家仲欠朋友成百萬債,原因係多年前佢日本籍姐夫因癌病醫到傾家蕩產,但姐姐唔想放棄,所以薰妮幫手問朋友借錢畀姐夫去北京醫,可惜姐夫最後都係要走,薰妮就努力工作還錢。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載