蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年08月06日

都是那些年:文雪兒惜張國榮早逝

文雪兒自問現時可以做楊怡阿媽,所以考慮復出。攝影:陳慧安

16歲出道即做女主角的文雪兒,淡出娛樂圈多年轉戰商界,略有成績,經歷過高低起跌,眼見昔日合作的張國榮、鍾保羅一一離世,令她學懂珍惜與平衡生活,隨着兩個女兒長大,文雪兒準備過自己想過的生活,愛演戲的她,已裝備好,隨時復出。 撰文:羅美倫

現年52歲的文雪兒76年加入佳藝電視,即與米雪成為當家花旦,78年佳視執笠被亞視挖角,她的古裝最深入民心,其中與張國榮合作《浣花洗劍錄》成螢幕情侶;在青春劇《甜甜廿四味》再配鍾保羅及莫少聰,同劇還有剛出道的關之琳,一直擔演女主角的她,至80年代末過檔無綫發展,91、92年拍完《劍魔獨孤求敗》、《皇家鐵馬》等便退出娛樂圈。

開美甲連鎖店

轉眼20年,文雪兒已是10多間美甲連鎖店的老闆,千禧年她因興趣與幾個朋友合資經營,估不到越做越大,發展成自己的事業,文雪兒說:「最初只係諗住打發時間,嗰時細女四歲,大女八歲,佢哋大咗時間多咗,仲專注去做,估唔到可以經歷沙士、金融海嘯,無心插柳由師奶玩意變大生意。」生意已上軌道,即使早前有人邀請到大陸開店,但文雪兒拒絕:「我覺得人要珍惜家現有嘅嘢,要享受吓,唔使太嘆又唔好太辛苦,要平衡,有事業都要有家庭,我自細做嘢咁多年,家都夠自己用同夠女讀書,唔需要做得太辛苦。」年輕時日捱夜捱,易滿足的文雪兒開始要享受人生,跟以往的經歷大有關係。

人生如戲,當年做女主角的她,男主角配過張國榮、鍾保羅、傅聲,可惜三人都英年早逝,而合作過的車保羅現在是月入數千的醫院雜工,生活拮据,關之琳由小女孩變成富婆,這一切的人生變化,都令文雪兒感慨萬千:「真係唔相信張國榮走咗,佢咁鍾意自己點會自殺?所以病係幾恐怖,亦冇得解釋;關之琳第一套劇就係《甜甜廿四味》,第一次見佢,嘩,呢個女仔靚到吖!做女仔都鍾意望住佢,佢做富婆或者任何嘢都好,最緊要開心。」
提起舊拍檔,文雪兒一下子走進時光隧道,她說:「記得傅聲死前一日仲喺片場扮狗咬我腳嚇我,佢係可愛小男孩,同佢開工冇冷場,佢好識人;鍾保羅可能係一時間欠債諗唔通,當時佢喺無綫做嘢,如果肯斬咗之前嘅嗜好,叫人畀啲時間,相信可以還債唔使嘥咗條命。」提起昔日拍檔,喚起文雪兒的陳年記憶,她還記得跟鍾保羅拍《甜甜廿四味》,睇住他被車撞受傷,她說:「因為佢受傷,套劇結婚時係鍾保羅,瞓醒變咗係莫少聰。大好青年就咁走咗,所以我要過自己嘅生活,做自己想做嘅嘢,以興趣行先。」

積極裝備復出

現時文雪兒跟建築師老公及與前夫所生的19歲大女兒張筠、15歲細女李佳欣生活輕鬆,問她可有戲癮,想過復出?文雪兒坦言:「有㗎!我一向鍾意做戲,一開頭就做女主角,到九幾年唔大唔細時又做唔到姐仔媽咪,啲角色唔係好適合自己,不如唔做,不過家覺得可以做楊怡阿媽喎,有番啲戲癮。」原來無綫有斟過她拍劇,只是文雪兒未遇到適合自己的劇本,只要適合,隨時復出,她笑言:「唔急,我不斷裝備自己,keep住唔會畀自己肥或者殘,隨時準備好喇!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載