› 選擇地區
三藩市
紐約
洛杉磯
其他美國地區
香港 台灣 北美
 
2012年08月17日

Sammi為生B唔做聖誕騷
安仔紅館搶灘賺奶粉錢

歌手年尾排隊在紅館開騷,樂壇教父顧嘉煇11月搞作品展,獲黃耀明、謝安琪和林子祥等群星畀面撐場,天后鄭秀文(Sammi)取消聖誕開騷,黃金檔期竟由未開過紅館騷的湯寶如膽粗粗頂上,湯記復出碌盡人情卡,卻拒搵舊愛梁漢文撐場。至於農曆新年則由Big4接力,據知Sammi為結婚生仔養好身體唔做騷,由男友許志安出力搵奶粉錢密密唱。
撰文:葉雪

湯記執Sammi二攤

檔期:12月22日
聖誕跨年黃金檔期,本來由天后鄭秀文獨領風騷,不過她以耳水不平衡為由決定唔唱,檔期被演唱會教父張耀榮冷手執個熱煎堆,還爆冷請未開過紅館騷的湯寶如復出攝位,張耀榮日前說:「我攞咗12月20至30號嘅期開3個騷,湯寶如同蕭敬騰都落實咗,仲有一個未講得。」
湯記將於12月22日開騷,她接受電話訪問興奮說:「今年係我入行20周年,第一次開紅館好有壓力,自己好耐冇出嚟,要做多啲宣傳。」問會否找舊愛梁漢文撐場?她說:「一定唔會,過咗咁耐唔好囉。」湯記謂會邀請以前寶麗金歌手幫手,如黎瑞恩和劉小慧,亦希望請張學友合唱《相思風雨中》。

群星拱照顧嘉煇

檔期:11月
顧嘉煇將於11月尾假紅館舉行4場作品展,邀請了黃耀明、林子祥、謝安琪、葉麗儀、張德蘭和甄妮等歌手助陣,製作人丘亞葵日前說:「本來05年舉行『煇黃演唱會』,不過霑叔04年走咗,煇哥好傷心,取消咗呢個騷,我游說咗煇哥7年,佢先肯返嚟開騷。」煇哥為悼念故友黃霑,在作品展中挑選多首霑叔的作品,由林子祥和謝安琪合唱經典作《兩忘煙水裏》,而今年是羅文逝世10周年,故請黃耀明演繹羅文金曲,前輩凌波將獻唱《郊道》。

Big4爭贏麟李

檔期:明年2月(農曆新年)
許志安、張衞健、蘇永康和梁漢文組成的Big4,竟撼低譚詠麟和李克勤的左麟右李,成功搶到農曆新年檔期開騷,安仔今年5月才開完25周年紀念演唱會,估唔到短短9個月,安仔就急不及待再上紅館銀。
其實安仔和Sammi被傳10月結婚,據知下周一便40歲生日的Sammi趕生仔,現積極調理身體準備做媽咪,寧願連聖誕的黃金檔期騷都唔做,將千萬歌酬拒諸門外,改由安仔努力搵奶粉錢頻頻開騷。
Sammi近日在微博上載喼弗相,並留言:「mi努力完成了今天的帶氧運動。」看來她經過一番努力後,身體和體能都好了很多,前日還留言謂一早起床為回歸電影做準備。

甄妮GiGi加咪咪

檔期:明年2月
甄妮前年才開完告別演唱會,話咁快就「復出」再踏紅館。升呢做人妻的梁詠琪(GiGi),亦計劃於明年2年舉行婚後首個紅館騷,唱完就專心養尊處優等生仔。搞笑高手朱咪咪亦不甘後人搭上紅館列車,以笑聲加歌聲佔領地盤。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載