蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年08月31日

不滿演唱會難產 與星煥反面
農夫怒極解約

農夫與星煥解約後,仍會完成之前接下的工作。 資料圖片

農夫本月初原本在九展開騷,但因門票滯銷,臨時被老闆星煥國際無情取消,導致雙方反面決裂。據知本於下月尾約滿的農夫,一怒之下決定提早解約,成員陸永承認彼此方針不同,無法繼續合作,星煥揸弗人何哲圖則指雙方和平解約,不需農夫賠錢,關係一筆勾銷。

農夫加盟星煥後一直不獲重視,本於本月11日於九展舉行「雙囍臨門」演唱會,有傳因同門的陳法拉獨霸資源,在宣傳不足情況下銷情欠佳,搞到演唱會難產收場,令農夫及其經理人DJ Tommy不滿。據知農夫本於下月尾約滿,雖然日子不遠,但雙方已經冇感情,長痛不如短痛,寧願速速解約回復自由身。

陸永:合作唔到

本報記者昨日致電陸永求證,不知是否想好聚好散,他承認不會跟星煥續約,但隱瞞解約事實,他說:「本來都係就快完約,好似9月尾10初,所以唔使解約啦。」問他是否跟星煥反面?他說:「之前我哋約何哲圖坐低傾過,我哋唔係反面,關係OK,唔係好僵啫,大家都唔係細路仔,冇嗌交,只係方針唔同,合作唔到落去,佢有自己方針,但唔啱農夫行。」
問演唱會被取消是否導火線?陸永坦言上月才推出唱片,但本月11日就要開騷,根本不夠時間宣傳,他無奈說:「我哋唔想好似一般流行歌手做法,但佢覺得一個月應該夠,唔使好長宣傳期,其實我哋都要負責任,我哋唔係巨星,唔係一開售就爆,以前我哋做開要兩個半月籌備,但佢做法唔同。」陸永謂之前接下的工作,約滿後都會繼續做,以後他們可以自己製作大碟,交由唱片公司發行,現正跟其他公司斟洽。

星煥:唔使賠錢

至於星煥行政總裁及董事總經理何哲圖昨承認跟農夫解約,他說:「我哋係和平解約,公司唔使農夫賠錢,大家冇反面,只係路向夾唔到。下半年公司會重點投資喺江若琳、鍾嘉欣、Super Girls、鄭欣宜、許廷鏗同胡鴻鈞身上,仲傾緊簽其他歌手。」
採訪:葉雪

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載