› 選擇地區
三藩市
紐約
洛杉磯
其他美國地區
香港 台灣 北美
 
2012年09月05日

林海峰寸黑貓變白
彭羚湊女全黑反洗腦

《佐敦+尖沙嘴》
彭羚噚日朝早七點幾湊細女林清返佐敦嘅女拔小學,老公林海峰因為喺商台開咪做節目,冇陪佢哋。家全城同心反國民教育,身為媽咪嘅彭羚,噚日全身黑色力撐學民思潮嘅同學仔,佢拖實囡囡入咗學校之後,逗留咗一陣就走,冇接受訪問。
彭羚老公林海峰亦同黑衫嘅老婆喺埋同一陣線,噚日喺商台嘅《在晴朗的一天出發》節目,就開咪寸爆國民教育應改名做「阿爺教育」,仲話:「家形勢一啲話撤回,一啲話歡迎提意見,不如大家傾改名先,國民教育改名做『阿爺教育』啦,開展期畀一萬年,學周星馳話齋。」林海峰仲想幫手編課程:「好多人擔心被洗腦,如果我有份參與,會要求課程寫流啲,黑貓係白色,咁上一萬年、二萬年都唔驚,越流越讀唔到入腦。」

阿徐鬧亞視

同林清一樣讀女拔嘅陳奕迅、徐濠縈囡囡康堤,噚日就由傭人帶返學,阿徐去尖沙嘴出席雜誌慶祝活動,佢話同學校有協議,盡量唔出現費事俾記者影相造成騷擾。講到亞視節目歪曲學民思潮,唔睇電視嘅阿徐都忍唔住鬧埋一份:「咁冇陰公,唔好咁話學生,免費電視台應該中立,維持新聞自由。」阿徐又慶幸女拔冇國民教育科:「自己同老公立場最緊要家教,我哋係政治白癡,冇呢科安樂晒。」
採訪、攝影:楊浩賢、梁繼光

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載