› 選擇地區
三藩市
紐約
洛杉磯
其他美國地區
香港 台灣 北美
 
2012年09月11日

撐躁導演冇虐神獸女
曾勵珍護愛將揪放片人

神獸天使劉蔚萱早前參演無綫新劇《心路GPS》,遭躁底導演張永豪用有味膠袋笠頭,及大力推她撼頭撞門。張永豪的惡行原來行內出晒名,無綫高層曾勵珍昨力撐他沒錯,更要揪出放片的幕後黑手。張永豪昨日潛水,劉蔚萱則封嘴拒談。

無綫導演張永豪近日執導新劇《心路GPS》,因神獸天使劉蔚萱表現欠佳,急躁的張永豪落場與她試戲,除依劇情用盛載過田雞的有味膠袋笠她頭,還大力推撞她頭撼木門,涉嫌虐待劉蔚萱的片段流出。有指張永豪是無綫製作部總監曾勵珍親戚,才被包庇,珍姐昨日與該劇監製李艷芳在將軍澳電視城繼續維護張永豪沒有錯。

「對導演唔公平」

有指事件後珍姐下旨冚實醜聞,張永豪和劉蔚萱前晚在電視城拍攝《心》劇,劉蔚萱昨日在電話中口窒窒說:「我唔回應啦,我估唔到咁,多謝大家關心。」前晚與張永豪可有尷尬,她說:「正常做嘢,唔講咁多。」
珍姐昨日否認跟張永豪是親戚,但仍力撐說:「網上條片係斷章取義,當日監製都在場。單睇一條片,對導演同製作唔公道,我有睇番前後嘅片,大家係有講有笑,事後個女仔都冇嘢繼續拍。」爆料片段顯示張永豪的確大力推撞劉蔚萱,珍姐卻說:「又唔係同佢有仇,要花咁多時間拍,唔係躁,係急。」珍姐更叉開話題指必要揪出發放片段的幕後黑手:「捉到邊個,公司會商量點處分。」珍姐表示劉蔚萱日前主動約見監製李艷芳,為表現失準致歉,李艷芳說:「佢同我say sorry,仲建議放田雞喺膊頭補拍。」

阿澤蔡少芬譴責

同劇的陳展鵬和麥長青有跟張永豪合作,麥長青昨日說:「小事一樁,係經驗問題。」陳展鵬則說:「每個人性格唔同,人夾人緣。」
張永豪臭史越揭越多,杜汶澤昨在facebook說:「呢條友喺亞視做PA已經short short哋……如果呢個女仔換轉係我老婆,佢今日未必上C1,可能係A1,因為畀我殺咗。」蔡少芬也在微博力撐:「要正視此事!不應再讓這個導演傷害別人!」鄺文珣也說:「不要怕,要出聲。」
張永豪在無綫藝人圈犯眾憎,有指他曾跟前港男趙國東合作,張永豪爆粗辣㷫身形健碩的趙國東,被對方揪起才收聲,趙國東昨日說:「講粗口係佢習慣,我冇揪起佢,我反問叫佢講多次啫。」
採訪、攝影:楊潔雯、葉雪

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載