› 選擇地區
三藩市
紐約
洛杉磯
其他美國地區
香港 台灣 北美
 
2012年09月13日

良心歌手有壓力
黃耀明怕撐唔住

「慢必」陳志全當選立法會議員後公開同志身份,並揚言要爭取同性戀婚姻合法化,同樣勇於「出櫃」的歌手黃耀明,希望對方講得出做得到,泛民和建制派都可以支持;而在反國教事件上被封「良心歌手」的明哥,慨嘆被打壓好恐怖,不知自己可以撐幾耐!

黃耀明和蔡卓妍(阿Sa)昨日到尖沙嘴為鞋履品牌壓軸行騷,輪盡的阿Sa幾乎絆倒,邊拍心口邊行天橋,事後她自嘲:「好搞笑,自己真係驚,好在冇坐低。」日前挺身撐反洗腦的明哥,剛從北京工作返港,他說:「喺北京好安全,我冇犯法,點解會有事?如果有事就真係要走!」有記者嘆謂冇得走,明哥笑說:「我都走唔到,只有特區護照,要走就投奔怒海。」

「係好差嘅施政」

問會否再支持反國民教育?明哥說:「雖然學生離開廣場停止絕食,但抗爭未完,未撤除只係掩眼法,唔啱應即刪除科目,唔係逐樣做,咁樣係好差嘅施政。」對於被封為良心歌手,明哥坦言有壓力:「其他人有良心都冇用,現實迫人好恐怖,有人想講一兩句都被打壓,唔知幾時打到嚟我呢度,我有壓力,唔知可以撐幾耐。」不過明哥表態一定會唱反國教歌《Can we talk》。

盼慢必言出必行

對於立法會選舉完結,慢必當選議員後承認是同志,更表示會為同性戀者爭取權益,包括婚姻合法化,慢必前晚去尖沙嘴出席《一路向西》首映;而早前在達明演唱會上直認「出櫃」的明哥,亦希望同志在香港可合法結婚,他說:「希望佢做到,其實唔止佢,何秀蘭(工黨副主席)係最支持,有志願組織都希望立法反歧視、婚姻法,希望到時民主派同建制派都支持。」
提及民建聯的劉江華落選全城歡呼,明哥說:「梗係有留意,咁揚,我當然希望佢輸,想多啲泛民人有議席,一直撐佢哋,不過建制派配票好勁,要數學犀利嘅人先計到,睇到有操控。」而撐泛民的黃家強昨日在微博上載劉江華惡搞相,留言:「開香檳!哈哈!」
採訪:李珮洳 攝影:黃偉雄

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載