› 選擇地區
三藩市
紐約
洛杉磯
其他美國地區
香港 台灣 北美
 
2012年10月13日

伊健、基仔惡搞江南Style

呢排成日聽到Oppa Gangnam Style!但眼前肥佬唔係PSY,而係出名囡囡多、明星朋友仲多嘅肥監製錢國偉(Wilson),佢一聲令下,一班老友曾志偉、錢嘉樂、JJ賈曉晨,加埋啲乜乜天使一齊二次創作咗首《Hong Kong Style》,鄭伊健同古巨基仲自薦幫佢做導演拍MV!惡搞MV同正版《江南Style》幾可亂真,製作比TVB更認真。只見Wilson以肥騰騰身軀,喺鬧市、地鐵、電車度扭嚟扭去,肥頭耷耳好cute啫!

Wilson今次好有艷福,有索女JJ同一班天使同佢猛咁跳,可惜肥Wil節奏感不足,成日俾導演鬧。基仔噚日喺電話度爆料:「聽伊健講Wilson初入行時想做幕前,我哋咪完成佢夢想囉!佢平時做導演鬧人鬧得多,今次俾我哋鬧到七彩,因為佢唔入戲,啲舞成日甩,佢顧得跳舞口就擘大,伊健笑佢『咖喱嘴』,我就話佢似『金魚嘴』囉!」

至於Wilson就話冇諗過進軍韓國,亦唔擔心版權問題:「惡搞吓啫,見各地有好多唔同版本,純粹等香港人笑吓。」伊健則說﹕「Wilson唔合格,做番幕後啦!我哋唔係抄,係玩二次創作。」原來MV成本勁低,大部份場景、化妝、set頭都有贊助,嚟緊仲有花絮片段睇,應該勁搞笑囉!
撰文:洪紅克

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載