› 選擇地區
三藩市
紐約
洛杉磯
其他美國地區
香港 台灣 北美
 
2012年10月13日

有話兒:陳茵媺、黃德斌真情催淚

黃德斌和陳茵媺在《天梯》中演繹一幕真摰簡單的舊時代愛情故事,觸動觀眾心靈。攝影:葉君海

向來被視為戚其義御用演員的黃德斌,今次在李添勝監製的無綫劇《天梯》,放下《天與地》的沉重包袱,擺脫《心戰》的邪惡心魔,與陳茵媺上演一幕真摰簡單的舊時代愛情故事。飾演鄭嬌的黃德斌充當陳茵媺演的田愛娣的守護神,與她一起共度難關,或許觸動你我她久違了的愛情感覺。
撰文:何慧斯

與黃德斌和陳茵媺談到今次在無綫劇《天梯》的一段愛情故事,黃德斌被笑稱終於可以拍一套愛情故事,更因而發覺他原來是一個有heart的人,他笑說:「係呀,仲要同一個咁摩登嘅女仔拍一個咁傳統嘅愛情故事,梗係OK喇。我打從《妙手仁心》嘅何德廣開始,已經好深情,但係跟住我嘅所謂愛情全部都係畸形嘅,一係身份好懸殊,又或者愛得好激烈,變咗未見過呢種咁傳統、純真嘅愛情。」

驚喜觀眾受落

黃德斌續說:「我哋段愛情係慢慢滲透,有時感情就係慢慢去發生,初初覺得呢個女人好可憐,慢慢諗起自己個老婆,自己個遺憾,喺戲劇世界裏面,有遺憾先有番啲色彩。今次編劇同編審都好有心機,拍嗰陣大家都成日鼓勵大家,估唔到有咁多觀眾接受,所以都幾開心。」在旁的陳茵媺亦說:「或者係多人渴望先會睇,家好少呢類人,加上德斌man得嚟對女人又有軟弱嘅一面,變咗好立體。」
首次飾演悲劇人物的陳茵媺,坦言今次的確令她有新體驗:「呢個角色其實都好多變化,阿娣係一個悲劇人物,佢對愛嘅要求只係一種依靠,需要一個可以扶持、支持同畀到信心佢嘅人,就算做小三都唔係想破壞人哋家庭,只不過係想搵個人照顧。我都好感激今次有呢個挑戰,對我嚟講都有一定嘅難度,差唔多場場都喊,真係有難度,變咗我要好投入,墮入呢個女仔嘅背景。」

培養情緒真喊

問陳茵媺會否難抽離?她坦言:「嗰幾個月keep住個mood好差,唔可以成日笑,由揸車返工開始已經要培養情緒,我喊出嚟嗰啲全部都係真眼淚,要真眼淚先可以有嗰種感覺,阿娣佢remind(提醒)我做人唔可以認命,只要你想做某樣嘢,包括係愛情,都要執着同堅持,如果上天畀咗一個人你哋相遇,佢哋兩個都要堅持去度過每一個難關,先可以行到尾,唔可以放棄,一放棄就會輸。」
問陳茵媺會給自己幾多分?她笑說:「今次個題材真係好特別,好難得,我有好多朋友讚我入戲,我已經覺得好開心,最緊要係大家睇得舒服,希望呢個角色可以感動到啲觀眾。」
髮型:Patrick So of HH Salon(陳茵媺)

鐵漢籲惜緣

現實生活中陳茵媺和陳豪處於熱戀狀態,反而黃德斌與圈外女友拍拖十年,曾有人覺得《天梯》故事情節反映現實,但黃德斌不認同並說:「又唔係好似我,我覺得因為有好多人都有呢個經歷,先會有咁多人睇同共鳴。呢部戲畀人體會有好多唔同嘅感情,唔同嘅感動,劇中當然係話愛係一切,不過事實上愛其實最終可以令到你好痛苦,有啲嘢未必係你堅持就得,尤其愛更加係冇得你去講。」

「結果唔重要」

黃德斌續說:「始終係兩個唔同嘅人走埋一齊,有時冇得你去勉強同堅持,仲要睇埋好多人同環境嘅因素,呢個結果未必係開始所預計嘅結果,可能最後只係得痛苦,反而接受個事實而去放棄,可能會海闊天空。如果你家問我,無論邊一種愛情故事,我都覺得珍惜,無論work定唔work,相處嗰陣一定要珍惜,唔可以好負面去睇,大家一齊努力同珍惜每一天,最後結果係點,似乎已經唔重要。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載