蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年10月16日

綠葉王:蘇恩磁密食當三番

蘇恩磁的名字大家可能比較陌生,但一望她的樣子,觀眾肯定會認得出她。攝影:陳順禎

一套劇集的成功,除了有一個完美的劇本、男女主角精湛的演出外,貫穿整套戲劇脈絡的綠葉演員,實在亦不容忽視。入行廿二年,曾經演過無數師奶闊太、街坊甲,直到因為《巴不得媽媽……》飾演汪明荃助手蘇露華而開始被人認識的蘇恩磁,她直言接戲的宗旨是密食當三番:「你問我點解乜嘢角色都會做,我係唔想停落嚟,如果我揀角色做,未必個個監製都會用我,你知啲觀眾好善忘,過咗一排攤凍咗就會唔記得。」一段簡單的說話,道盡箇中辛酸。撰文:何慧斯

根據網上資料的記載,蘇恩磁從90年代初至今,粗略計算演出過百套的電視劇,可惜過百套作品中,不單佔戲不多,當中更有連一句對白都沒有,直到《巴不得媽媽……》的出現,總算為她的演戲生涯,添上點點色彩,她說:「我最主要嗰條線係跟住阿姐,所以好多時都會見到我,呢次係我佔戲最多嘅一次,德哥(潘嘉德)佢好肯用新人、好肯試,喺呢套戲裡面好多人都有戲做,返嚟無綫廿幾年,呢部戲真係拍得好開心。」

曾轉行不習慣

蘇恩磁曾經投考過無綫第二期藝員訓練班,畢業後試過拍劇,其後轉行做寫字樓工,最後發覺原來最愛在水銀燈下工作,於是重投無綫工作至今,她說:「嗰時後生,諗住可以試其他嘢,仲去咗外國生活,可能呢份係我正式嘅工作,所以點都會覺得做呢一行好開心,亦慶幸有呢個改變,如果唔係都唔知做乜好。」
蘇恩磁提到剛回無綫的感受,她說:「啱啱返嚟嗰陣,我都希望可以多啲嘢做,做好啲嘢,但係你知道做藝人係好被動,唔到我哋去控制,我本來唔係用呢個名,係返咗嚟一年之後改咗個名,當自己係新人咁做,唔好將以前啲包袱放喺自己身上,咁會舒服啲。」

被老前輩否定

對於演藝工作,蘇恩磁說:「我家係當一份工作,總之有戲咪盡量拍,做好自己嘅本份,我哋公司要還騷,你做唔夠就要還,變咗你乜嘢都要做,我好慶幸自己未試過,呢幾年我嘅工作量都幾多,基本上你會喺好多節目見到我,做嘢嚟講都OK。」
不過多年前發生的一件事,令蘇恩磁困擾了一陣子,她說:「我試過俾老前輩否定過我,可能佢見我做得多師奶甲乙丙,覺得我唔勝任,佢對某啲人話我唔應該做嗰個角色,我唔知佢係好意定惡意,因為佢唔係對住我講,嗰時真係好唔開心,點解做咗咁多年仲會俾人哋咁樣嚟睇?結果都調咗我嘅角色,呢個人係邊個唔想講。」

盡力培育新人

蘇恩磁經歷此事後,她表示:「我覺得一個咁資深嘅演員,如果你可以帶一個演員入戲,我覺得你係成功,但係如果你要一個有份量嘅人襯你,你先可以到戲,我覺得佢真係失敗。不過呢個係好好經驗,家只要有一個角色畀我做,我會更加做得好,甚至亦會好好對啲新演員,我唔想佢哋有類似嘅經歷,當然有時講未必會接受,始終有啲後生淨係識啲阿哥阿姐,見到咁嘅情形都無謂講。」
至於對將來的期待,蘇恩磁只說:「冇得期待,話事權唔喺我自己度,只係等一個機會,所以你問我點解乜嘢角色都會做,我係唔想停落嚟,可能我揀角色做,未必個個監製都會用我,我又要等一輪,你知啲觀眾好善忘,過咗一排攤凍咗就會唔記得。」

投考第二期藝員訓練班而入行的蘇恩磁,曾經參與不少劇集的演出,包括《依家有喜》、《怒火街頭》及《東方之珠》等,角色多為闊太、同事、街坊及師奶等等,直到近期憑《巴不得媽媽……》飾演蘇露華而為人所熟悉。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載