蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年10月21日

我主場:魯芬的故事

魯芬的故事由20多歲玩票跟契爺董驃演出說起,接着獲邱德根賞識加入亞視做藝員。再經曾志偉介紹投身影圈拍了電影《女子監獄》,當中山東婆的角色,奠定她影壇惡婆地位。一惡十多年,但凡醜婦、惡女人角色,製片都義無反顧找她來演,敬業樂業的魯芬從不介意,只因劇情需要。
近日好事的高登仔在網上搞個女神選舉,不以樣取勝的魯芬居然上榜,似乎玩味甚濃,姪仔都看出端倪指「姑媽人哋玩你咋」,自言百搭甚麼都演得的魯芬繼續少理,覺得「牡丹雖好都要綠葉扶持,我都係輸陳法拉少少排第八咋」,演員最高境界就是要忘我投入,故事都是由劇情需要說起……
撰文:何永寧

原名張偉芬的魯芬既是《女子監獄》中被鄭裕玲打到頭破血流的山東婆、又是《九品芝麻官》中嗌輸交頭頂出煙的烈火奶奶,藝名的由來是因為朋輩中都以「老」字相稱而改。她入行的經過很簡單,因為有一個知名的契爺董驃,芬姐記得86年第一次演出是跟熊良錫在觀塘的戶外表演,當時搞的是棟篤笑:「嗰時同熊良錫幫觀塘節做節目搞笑,亞洲電視老闆邱德根睇完叫契爺搵我簽約做演員,我拍過好多劇集都係客串,入電視圈都係當玩,自己仲有份正職,靠亞視份糧,我咁肥點養得起我。」

「大聲唔代表冇禮貌」

到88年芬姐經曾志偉介紹拍了人生第一套電影《女子監獄》,當中演的是獄中蝦蝦霸霸的大家姐山東婆,她說:「志偉現在位老婆係同我由細玩到大,志偉哥見角色啱咪搵我幫手。」自此奠定影圈中惡婆娘的地位,現實中的芬姐都很火,化妝期間先後多次見她對着手提電話咆哮,罵的是自己的助手,她說:「我大聲唔代表我冇禮貌,啲人講極都唔明。而且我咁大份講嘢係大聲啲,不過我係有道理嘅大聲,我陰聲細氣同你講嘢你都驚啦。」

烈火奶奶內地吸客

雖然定位是惡婆,但搞笑亦有一手,早前就曾經在公開活動跟余慕蓮扮BB出場,笑死不少現場觀眾,她覺得要不就不做,要做就要專業,閒角亦有發揮的空間,她說:「人哋搵我係欣賞至搵我、識得尊重我,所以演乜我唔介意,而且我好鍾意玩,我飲醉酒仲好玩,娛樂圈係娛己娛人。最近拍杜Sir(杜琪峯)套《盲探》就最開心,除咗杜Sir搵我拍戲開心,仲住咗四晚靚酒店,唔係個個有呢種待遇,係班製片手足關照我嘅。」人很簡單有時要的只是一份尊重。
魯芬在《九品芝麻官》演的烈火奶奶及《龍咁威2之皇母娘娘呢》中的奀妹都令人印象深刻,亦令她在內地有不少擁躉:「佢哋見到我都係叫我烈火奶奶唔係叫我名,好多人都搵我返內地登台。接頭人會話『芬姐個場就麻麻,希望你唔會介意』,我話你搵我咁識貨有乜介意。」

「陳法拉贏我少少咋」

識貨的還有一班高登的網友,近日在高登網站搞了個高登女神選舉,芬姐亦榜上有名,跟謝安琪、劉心悠、苟芸慧等高登BB齊名,被稱為魯芬BB。芬姐只從姪仔口中得知此事:「我都唔知乜事,話我係高登女神喎,係我個肥仔姪仔話我知。佢同我講『姑媽你唔好理佢哋啦,佢哋笑你咋,點會輪到你』,好似今次訪問佢都叫我唔好嚟,話啲人搵你去笑。我話怕乜嘢呀?搞笑搞到我咁都唔錯,有時牡丹都要綠葉襯吓。而且我都唔錯,女神榜排第八名,陳法拉都係贏我少少咋。」自言不是紅人,有人記得已經很開心,她笑言有機會會跟網友玩埋一份。
芬姐對於事業沒有特別要求,但對演出仍有一團火,遲些會到北京簽經理人合約拍劇,跟一眾阿哥阿姐看齊,不求大富大貴就只要有人賞識。閒時會跟三五知己在元朗她稱為Happy House的私竇聚會,別小覷她外形粗豪,能煮得一手好上海菜,試過的朋友都讚不絕口,她指契爺驃叔生前就最喜歡吃:「契爺最鍾意食,佢生日就一定要我煮佢食,煮嘢係我興趣唔想變成生意。」

山東婆靠惡搵食

高登女神魯芬,原名張偉芬,擁有典型山東人的骨架。她和曾志偉的現任妻子由細玩到大,88年獲志偉邀請加入娛樂圈。首部作品是電影《女子監獄》,也是她從影以來的代表作。她在片中扮演監躉「山東婆」,恃着龐大身軀在獄中蝦蝦霸霸,其中與夏文汐、鄭裕玲互毆的場面令人印象深刻。魯芬後來拍攝的大多是喜劇,專演醜女角色,其中包括《九品芝麻官》裏的烈火奶奶和《整蠱專家》的大白鯊等等。

貪靚女神

魯芬自言年齡不是自己的秘密,跟成龍同年同月同日生,訪問的地點由原本的中上環臨時移到她的主場元朗,都是芬姐的主意。本身不是圍村人,因為弟弟娶了一位圍村姑娘,所以搬入元朗跟弟弟、弟婦及姪仔、女同住,還有一位妹妹已移居荷蘭。

17歲初戀

取景的圍村古舊大屋亦是靠芬姐的關係借來,她自豪地說:「呢度拍過好多戲,《龍咁威2》都喺度拍,好多時TVB都係叫我幫佢搵景。」不是大紅大紫,但芬姐的優點是認真,除了場地旗袍是私伙外,化妝師都是御用那位,為求最好效果,妝一化就大半小時,還不計期間對着電話鬧人的時間。問到她是否貪靚?芬姐直認不諱說:「我貪靚㗎!都有用護膚品,但都係純天然用品。」拍拖已經是很遙遠的事,她說:「我未結婚都冇初戀,邊有咁多嘢,後生咪拍吓啲puppy love嗰時得17歲。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載