› 選擇地區
三藩市
紐約
洛杉磯
其他美國地區
香港 台灣 北美
 
2012年11月06日

綠葉王:梁健平乜都拍搵位突圍

梁健平今年離開無綫,轉投城電,他表示想尋回昔日的親切感。 攝影:林德雄

曾飾演威利哥和陸光超而為人認識的梁健平,當年畢業後第一份工就在邵氏工作,及後轉到無綫,他坦言一直視邵逸夫(六叔)為老闆,如今六叔已退休,於是他帶着放眼看世界心態過檔CTI,跟無綫結束30年賓主關係。他在無綫時產量頗多,很多劇都見到他的演出,他覺得藝人不應該揀騷,因為「任何機會都係機會」,只要機會一到就可突圍而出!撰文:黃曉妍

梁健平在邵氏做冲印,沉悶的工作令他做了一年就轉投無綫,他指當年電影產量很少,相對工作也很快完成,最開心是中午食飯,他會走到攝影棚睇拍戲,他說:「記得有次有場戲講傅聲俾人吊上半空,身上有十萬支箭,劉家良、劉家輝坐喺門口度等set-up,好有大哥風範。」由小到大,梁健平是個電視迷,試過有女同學約他,他以趕回家追看鄭少秋的《倚天屠龍記》為由而婉拒,他笑說:「我點會為咗佢而放棄秋官。」

心痛同事冇糧出

後來梁健平自薦入無綫,任職道具佈景組,他謂當時一直等待機會出現:「出面街(電影)會入嚟TVB揀蟀,當年TVB真係好巴閉,我見過鄭裕玲周潤發喺旺角,萬人空巷,正如早前劉德華喺旺角同一個情況。後來我轉咗做廣告三年,大約80年代初,當時我乜都要做,試過有人叫我撈埋演員拍廣告,之後開始咗演員生涯。」
梁健平在無綫演出劇集多不勝數,他笑說:「年初拍《女警愛作戰》,周麗淇問我點解套套劇都有我,我作咗個藉口,我話自己係TVB清道夫,乜鬼垃圾我都掃。作為一個普通藝員唔應該推騷、唔應該揀嘢,發哥當年講,千揀萬揀嗰套戲係唔爆,佢拍《賭神》、《秋天的童話》,佢有信心咩?但就係爆咗,我唔知我會唔會撞到,所以任何機會都係機會,人哋認為你做某一個位,人哋自然會揀你,所以無謂去強求。」在《潛行狙擊》中飾演威利哥,在《拳王》中飾演陸光超,有觀眾仍然記得,梁健平說:「有次行尖沙嘴,有班搭棚工人離遠隔條馬路叫我做『威利哥』,我望一望,吓!咁都認到,佢哋好熱情,呢兩個角色係我臨走前,TVB送畀我嘅禮物,所以我好多謝兩位監製莊偉健同羅禮賢。」

不少前無綫藝員狂呻多年來沒加人工,底薪也奀得可憐,梁健平透露當年爆騷,但無綫只加他50元一個騷錢,他說:「公司當時同我講我已經好好,有啲冇得加㗎,仲話過兩年唔知業績會唔會倒退,所以唔加咁多,或者唔會加畀我,好彩我有幸今日仲未死。收入一直冇OK過,我咪食平啲囉,而且我慶幸太太有份好職業,有好收入,可以支持到我做表演藝術,其實我只係希望有合理待遇。今年5月我過嚟CTI,後來聽到TVB舊同事有人工加,我好戥佢哋開心,因為我好心噏,曾經見過有同事唔夠騷冇糧出,好多人因為咁要離開,我個心好唔安樂,好彩監製李添勝、潘嘉德同王心慰出手救同事,畀劇佢哋拍,咁先度過難關。」

齋識喊唔算好戲

梁健平離開無綫,除想轉換新環境外,最想尋回昔日那份親切感,他說:「新公司有新衝擊、新士氣,好似拍青春歌舞劇《童話戀曲201314》,見到班細路跳舞好開心,大家好有活力,喺舊公司係睇唔到呢啲,老闆王維基無啦啦會叫廚師煮三餸一湯,然後搵人車嚟外景畀我哋。」梁健平還希望拍更多好戲:「催人熱淚唔難演,我唔覺得流眼淚嗰啲人好戲,令到觀眾睇完有得着或影響到觀眾,例如男女分手、有家人離世,但因為戲中一句對白、我嘅一場戲令觀眾釋懷,呢個係我嘅目標。」梁健平希望CTI快點獲政府發牌,刺激電視行業,有良性競爭,令這個行業蓬勃起來。

人物誌:角色多變 宜忠宜奸

梁健平現年46歲,畢業後加入邵氏工作,其後簽約無綫,從80年代活躍至今,他演過的劇集多不勝數,包括《城市故事》、《壹號皇庭》、《棟篤神探》、《潛行狙擊》和《拳王》等,角色多變,忠奸皆宜,最令人印象深刻的角色是《潛行狙擊》中的黑幫堂主威利、《耀舞長安》中的教坊廚師包昇及《拳王》中的反派富商陸光超,而今年他離開無綫,轉投王維基旗下的城市電訊。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載