蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年11月27日

綠葉王:劉桂芳御用管家憂嫁期

劉桂芳對演戲有濃厚興趣,為了爭取更多演出機會,她參與演出舞台劇。攝影:黃文偉

如果80年代有「十大電視廣告頒獎典禮」,劉桂芳有機會是最佳電視廣告女主角,當年她被星探發掘,拍過刀嘜、潔霸、高露潔廣告,但劉母拒讓女兒泳裝演許氏兄弟的《天才與白痴》,錯失機會。最終劉桂芳仍當上演員,最近更成為電視城出名的管家,由30年代《名媛望族》、50年代《初五啟市錄》到時裝劇《心路GPS》,大概也離不開做管家的角色。
撰文:楊潔雯

劉桂芳(Lau Kwai Fong)又名蘭桂坊,88年簽約無綫至今,是忠心的老臣子,一直擔當中堅分子,忠心耿直的管家、挑撥離間的師奶和撩事鬥非的三姑六婆,對一套高收視劇集來講,這些二打六,一個都不能少,但是在娛樂圈的潛規則裏面,他們多數成為犧牲品。

感激躁底導演

天生膽小的劉桂芳,經常遇到不公平的對待,或者今日她已習以為常,她說:「唉!我好坦白,但我驚住畀其他導演睇到,唔知會唔會鬧我,好似導演張永豪(躁底導演),佢對我嚟講係好,因為佢睇到我哋呢啲茄喱啡、塘邊鶴,唔會話唔畀鏡頭你,如果真係需要,同劇情有關,佢個鏡頭一定會落喺你身上,但係有啲導演唔係㗎!話之你做到死,個鏡頭好似驚你影污糟個畫面咁,佢係會公平啲。」
劉桂芳續說:「我遇過個導演,話劇情講我個仔死咗,叫我喊到呼天搶地,咁我真係喊到口水鼻涕都出晒,之後睇帶連個影都冇,原來我係做到咁凄凉,畀個主角見到我有個咁慘嘅樣,等佢可以做一個黯然神傷嘅樣,等我喊餐死做餐死,又跪又拜又癲咁樣,最後原來係咁。」
對劉桂芳來說,在每一套劇裏,有多幾句對白,多次出現在鏡頭,已經心滿意足,她說:「好似最近拍到監製李艷芳套《心路GPS》,我覺得好好玩,拍到嗰兩個導演好認真,我好開心,我喺入面有啲對白講吓,講我帶李司棋去澳門打麻雀,話我爛賭又俾大耳窿追數。」
在無綫24年,劉桂芳覺得自己只是一個過鏡的茄喱啡,事實如此,仍未減退她對演戲的熱誠,在電視圈以外,她尋找到一個新天地,她說:「我好鍾意玩話劇,因為佢可以控制喺我手上,同埋做話劇好有滿足感,好似老前輩陳蝶衣都曾經讚過我,話我No.1,嗰時我真係好開心。」

嫁唔出賴夏雨

從前略有所聞,一直未經證實,20年來,劉桂芳被無數人誤以為她是夏雨太太馬慧玲,劉桂芳藉此機會嚴正聲明,並再三懇請代為澄清,好讓她覓得真姻緣:「真係好冤枉,你知唔知,我住嗰度嘅業主立案法團,話我同佢(夏雨)搞離婚,死口唔認係夏雨老婆。又試過喺酒樓食嘢,有人同我講話:『又撞到你,真係有緣喇!』我話點解有緣?佢話:『我喺加拿大成日見到你湊仔餵奶。』我心諗幾時喺加拿大湊仔餵奶呀?仲有初初入TVB,有個助導走埋嚟,問我:『幾時返嚟㗎?』我咪話:『你畀幾點鐘通告我咪幾點返嚟囉!』佢再問:『你幾時喺加拿大返嚟呀?』」
不願透露年齡的劉桂芳續說:「原來個助導認錯咗我係馬慧玲,幾離譜呀!你諗吓離譜到咁樣,我唔知有幾似,但係我未見過佢,不過夏雨都話似,人哋成日叫我夏太,我做咗廿幾年喇!幾陰功呀!快啲幫我澄清呀!我好慘囉!可能因為咁搞到我家都仲係單身,所以我見到夏雨都有鬧佢,我話後尾嗰幾廿年你養埋我。」

忠心效力無綫24年

劉桂芳擅長演管家,88年簽約無綫至今,作品包括《晉文公傳奇》飾驪姬、《蜀山奇俠》飾許飛娘、《天龍八部》飾喬三娘、《溏心風暴之家好月圓》飾師奶、《名媛望族》飾雲姨、《巴不得媽媽...》飾馮太等。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載