蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年12月18日

綠葉王:戴耀明儍有儍福襟撈

戴耀明好動健談,入行二十年,最常演儍仔或智障人士。攝影:陳慧安

在《心戰》演酒吧五人組的戴耀明,中學時期常演舞台劇,畢業後選擇加入電視圈,雖然生計不成壓力,但工作卻未見起色,多年來最常見演儍仔、智障角色,做儍仔做足二十年,求的只是一個讓人認識的機會。去年戴耀明在電視圈挖角潮下仍選擇效忠無綫,只因飲水思源:「無綫話晒都養活咗我一家十幾廿年。」
撰文:卓寶花

相關新聞:達也《義海豪情》爭氣

戴耀明中五畢業無心向學,前途未明,因阿媽一句話:「搵份工頂住先啦。」就去投考亞視藝員訓練班,初嘗拍劇就跟現已成為資深監製的戚其義到加拿大拍攝《李小龍傳》,第一份工作已衝出香港放眼世界,對一位剛投身社會的年輕人而言,繽紛色彩盡入眼簾,戴耀明說:「當時覺得好好玩,咁大個仔第一次坐飛機,仲要去加拿大。」

多得戚其義關照

然而亞視傳統慣性低收視,劇集出街亦沒甚麼迴響,當時初出茅廬的戴耀明也洞悉先機,萌起離開亞視的念頭,轉投無綫打工,一做便接近二十年。戴耀明來自普通家庭,住公屋,家庭負擔不算重,尚未有太大經濟壓力。加入無綫頭幾年,戴耀明都爆騷,一直有監製找他拍劇,而同樣轉投無綫的監製戚其義有劇開也會關照他,不知不覺成為合作夥伴,演出機會不斷累積。
戴耀明演過醫生、流氓、大賊、變態佬、警察等角色,甚至醜女都試過,但最常見就是二打六的儍仔角色,要觀眾實實在在直呼戴耀明名字實在有難度,反而被人在街上叫:「呢,個儍仔呀,個低能仔呀。」來得更自然,戴耀明說:「乜嘢都做,最多係低能仔,個樣重要騎呢嗰種,一係就有包白粉袋喺身,蝦阿婆冇大志,大部份都作奸犯科,真係未試過做四正角色。」

自知樣貌難以擔當主角,就安份做好綠葉本份,戴耀明說:「睇我個樣都知天生唔係一線,頂多咪三線,只係希望有人認同吓,好似當年處境劇陳積(顏國樑飾)同斌仔(羅君左飾)咁,令人好深刻。」戴耀明亦替所有綠葉演員平反,鼓勵大家:「一套劇冇咗我哋係唔得,臨時演員都唔可以冇啦,唔能夠只係主線演員對答,紅花側邊冇綠葉唔會靚,成個構圖畫面好重要。」因此戴耀明沒介意不斷重複騎呢角色,只求有進步,聽起來好像沒有大志,但亦很理性。
前年戴耀明有份演劇集《鐵馬尋橋》飾演排長及《巾幗梟雄之義海豪情》飾演日本軍向山達也,《巾》劇其中一幕劇情是戴耀明看着陳法拉除衫,角色激發網民談論,對戴耀明無疑是小火花,他說:「當時以為有小小進步,但一下子又停滯不前,尤其《巾》劇個角色,叫做多咗人識,但度氣一陣又冇咗,多少有啲失望。」

羨慕古明華有運

同人唔同命,在劇集《巴不得媽媽…》中飾蘇基的古明華就是一個好例子,說到此時,戴耀明認命說:「佢原本冇撈幕前,去咗配音組,我哋日日返公司都見到佢,係德哥(監製潘嘉德)叫佢玩吓做蘇基,真係一個機會,冇人知,衰啲講咁都可以畀佢撞中咗,佢本來都諗住玩吓,仲話好辛苦,日頭要配音,夜晚要開廠,點知畀佢搞掂咗,真奇妙。」
近年大部份綠葉、甘草為了獲得尊重和歸屬感,紛紛離巢過檔王維基揸弗的香港電視,戴耀明甘願留在原地等待,他說:「舊年10月有挖角潮,公司不斷搵啲藝員續約,我二話不說就簽咗兩至三年,老實講我呢啲唔係主角位,即使走,人工唔會相差太遠,演員係等一個機會同角色出現,任何機構都會有,雖然無綫唔係高薪,但都養活我全家十幾廿年。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載